Tukin zingkar khan Lawngtlai Bazar-a Areopagy hmunah UD&PA Lawngtlai District leh TKP Electric Veng Unit te tang kawp chuan Swachh Bharat Mission (Urban) hnuaia hma lakna hrang hrang puanzarna leh faina lam inzirtirna hun an buatsaih.

He hun hi TKP Electric Veng Unit Finance Secretary Nl. K. Lalhmachhuani’n a kaihruai a. Unit President Pu Ng. Lalnunmawia’n tawngtaiin Pathian hnenah hun a hlan a. UD&PA hnuaia NULM Manager Pi Ramnunsangi’n Swachh Bharat Mission (Urban) hnuaia faina beihpui an thlak dan hrang hrang leh an hlawhtlinna te a tarlang a. TKP Unit executive committee member Tv. C. Lalhruaitluanga, Lawngtlai DIPRO chuan “faina leh thianghlimna” tih thupui hmangin faina pawimawhzia leh faina kawnga hma lakna tur kawng hrang hrang te a sawi a. Nl. Zosangpuii leh Tv. T. Lalrinfela te’n zaiin mipui an awi a. Unit Vice President Pu Lalmawizuala Renthlei chuan lawm thu sawiin, executive committee member Rbt. K. Lalramnghaka’n tawngtaiin hun a khar.

He hunah hian TKP Electric Veng Unit member eng emaw zat an kal khawm bakah, bazara dawr nei leh mipui vei vakte’n thu sawi te hi an ngaithla a ni.

UD&PA Lawngtlai hnuaia Swachh Bharat Mission (Urban) hma lakna hian Lawngtlai khawpuiah community toilet 3 leh individual household latrine 354 sak a ni a. Hemi vang hian Lawngtlai khawpui chu kumin January ni 4 khan inthiarna mumal nei lo awm lohna khawpui (ODF)-ah puan a lo ni tawh a. Veng tinah khawlaia hun tur bawlhhlawh bawm sem niin, VC, YLA leh zirna in te nen tang tlangin faina hnatlang thawh thin a ni a. Lawngtlai town beautification project hnuaiah khawpui chhunga lung rem langsar laite rawng hnawihin, hnam ziarang tilang thei milem mawi tak tak ziah a ni a. Swachh Bharat Marathon race te pawh buatsaih tawh niin, faina kawnga Lawngtlai khawpuiin hma a sawn zel theih nan hma lak chhoh reng a ni.