NABARD Mizoram, World Vision India (Chhimtuipui Area Programme) leh KVK Lawngtlai te tang kawp chuan Lawngtlai District-a Self Help Group (SHG)-te tan pickle leh balhla chip siam zirna (training) an buatsaih.

Vawiin (31.08.2016) chawhma dar 11:30 khan Lawngtlaia Carolyn Hotel-ah he training hi hawn a ni a. Lawngtlai District Deputy Commissioner Dr A. Muthamma chu Khuallian a ni.

DC chuan SHG-te tana training pawimawh tak mai buatsaih a ni chu lawmawm a tih thu a sawi a. Mizoramah sum leh pai thawk chhuaktu hmeichhia an tam tih sawiin, hmeichhiate chu sum peipun chungchangah an rinawmin an rin tlak bik a, hmeichhiain sum a enkawl chuan hmasawnna a thleng thin a ni, a ti. SHG kal tlanga Mizo hmeichhiate'n hmasawn tuma rim taka hna an thawk thin chu fakawm a tih thu sawiin, nute chuan an fate zirna leh hriselna ngai pawimawh a, fa lehkha thiam leh hrisel chher chhuak turin a chah a. An training-naa an zirte chu chhawr tangkai a, intodelh tur leh hlawhtlinpui tura theih tawp chhuah turin a chah bawk.

He hun hi World Vision CAP-a MCHN Coordinator Pu HL Rinawma'n a kaihruai a. NABARD Lunglei District Development Manager Pu Lalrokunga'n SHG chungchanga hriat tur pawimawh leh an hma lakna hrang hrang a tarlang.

Chawhnu lam atangin training hi tan a ni a. KVK Lawngtlai atangin Scientist-te'n pickle leh banana chip leh thil dang siam dan an zirtir a. Training hian September ni 2 thleng a awh ang.

World Vision India (Chhimtuipui Area Programme) enkawlna hnuaiah hian Lawngtlai District-ah SHG 618 an awm mek a. Chu'ng zinga 84 chu bank nena inzawm leh thawk ho tawh an ni. He training-a tel tur hian SHG 30 atangin ai awh pahnih theuh koh an ni.