2116/2026-2027

Lawngtlai, the 8th September, 2026: Vawiin chawhma dar 11:00 AM khan DC Conference Hall- ah 'Sensitization programme on Solid Waste Management (SWM) Rules, 2026; Plastic Waste Management (PWM) Rules, 2026 leh 'Mizoram Cleanliness Competition, 2026' hawnna neih a ni a. Bawrhsap Pu Donny Lalruatsanga chuan he hun hi kaihhruaiin Pu C. Lalsawmzual, CEM(LADC) chuan khuallian nia hmanpuiin hawnna a nei.

Pu C.Lalsawmzuala chuan Lawngtlai khawpuiin Faina leh Thianghlimna kawnga hma a sawn theihna tura infuihtharna leh hmalak dantur zirhona hun buatsaih a ni chu lawmawm a tih thu a sawi a. A bik takin Mizoram Cleanliness Competition 2026 - ah Lawngtlai District- in dinhmun tha zawk a hauh ngei a beisei awm tiin lawmawm taka a hawn thu a sawi a ni. Faina leh thianghlimnaa hmasawn turin mumal leh awmze neia bawlhhlawh sawngbawl a pawimawh hle a,hemi kawngah hian District Administration leh LADC chuan theihtawp chhuahin hma a la reng a ni, a ti. Faina leh thianghlimna kawngah LADC chuan hmalakna hrang hrang a kalpui reng thin tih sawiin, tuna kalpui mek 'CEM Cleanliness Competition' chuan rah tha tak a chhuah ngei a beisei thu a sawi a ni.

CEM chuan Solid Waste Management (SWM) Rules, 2026 leh Plastic Waste Management Rules, 2026 chu ngaihpawimawh a tul hle a, heihian khawpui fai leh thianghlim zawkah min hlângkai thei tiin Dan in a phut ang angte zawm that a pawimawh hle a ti. Mizoram Cleanliness Competition - ah Lawngtlai District- dinhmun a chhuanawm loh thin hle a, dinhmun tha zawk hauh turin kawng hrang hranga hmalak thiam a tul hle a ti a. A bik takin tuna kalpui mek Tho Law Dir Tuah (Stand up Lawngtlai), Bawrhsap Award leh CEM Cleanliness Competition' - te chuan rahtha a chhuah ngei a beisei thu a sawi a ni. CEM chuan Faina leh thianghlimna kawngah mi tinin mawhphurhna an nei tiin, Lawngtlai District- mipuite mahni zawn theuhah hmala tura chahin sawrkar tawiawm tlat turin a sawm nghal bawk.

Bawrhsap Pu Donny Lalruatsanga chuan Solid Waste Management Rules 2026 leh Plastic Waste Management Rules 2016 chungchanga Supreme Court thuchhuah bawhzuia hmalak tawhna hrang hrang leh hmachhawp neihte sawifiahna hun a nei a. Supreme Court Order 5/5/2026- a chhuakin October, 2026 hmain khawpui chhunga cheng 30% leh Thingtlanga cheng 15% te 'Ward Practicing 4 way Source Segregation' a taka tihlawhtling tura a phut angin; Lawngtlai khawpui chhunga Veng Pathum leh Lawngtlai, Bungtlang South, leh Sangau RD Block - a khaw - 26 leh Chawngte RD Block - a Kamalanagar -I,II,III & IV - ah te theih ang anga kalpui niin, hmalak mek zel a ni, a ti. Mumal taka bawlhhlawh thliar hran chu Zirna In, Sawrkar Office, Institutions leh Damdawi Inah te kalpui mek a ni a, August thla atang khan Awareness Campaign bakah '4 Ways Source Segregation' hi a remchan leh theih dan ang anga kalpui tan a nih thu a sawi bawk a ni.

Pu C.Lallawmsangzuala, Sanitation Officer, LADC chuan 'Tho law dir Tuah' hnuaia Clean Lawngtlai Committee- din dan leh CEM Cleanliness Competition - kalpui dan bakah Mizoram Cleanliness Competition, 2026 atana inbuatsaihna tura tul leh tehna hrang hrangte sawi zauna a nei a. Pu Elvis Lalthangzuala, President MJA Lawngtlai District chuan 'Bawrhsap Award' kalpui dan leh kalphung sawifiahna neiin, Pu K Vanlaldika, Head Faculty, DPRC Lawngtlai chuan SWM Rules 2026 leh PWM Rules 2016 hmangin Presentation a pe bawk a ni.

Vawiin hun hmannaah hian sawrkar Official- te,  Village Council (VC),  Tlawmngai Pawl leh Kohhran hrang hrang Thalai hruaitute an tel a ni.