Nehru Yuva Kendra (NYK) Lawngtlai leh Electric Veng Branch MHIP tang kawp buatsaih skill upgradation training programme hnuaia beautician zirna tur chu vawiin khan Bawihpuii Beauty Concept, Eectric Veng, Lawngtlaiah Lawngtlai District IPRO Pu C.Lalhruaitluanga chuan a hawng.

Pu C.Lalhruaitluanga chuan thalaite tana eizawnna kawng kawhhmuh tura NYK hma lakna chu fakin, chu training chu mahnia ding thei tura thalaite buatsaihna ni se a duh thu a sawi a. Huaisen tak leh mahni inringtawk taka thil ti thei turin mahni intodelh a pawimawh tih sawiin, tha taka zir a, mi dang tana malsawmna ni tur leh hma sawn zel tura theih tawp chhuah turin training turte chu a fuih a ni.

He hun hi Electric Veng Branch MHIP Vice President Pi F.Liannguri'n a kaihruai a. Bawihpuii Beauty Concept neitu Pi F.Zodinpuii chuan report pein, NYK District Youth Co-ordinator Pi Mercy Sellate chuan fuihna thu a sawi a. Zirlaite inhmelhriattirna hun hman a nih bakah, Branch MHIP Assistant Secretary Pi J.Lalremruati'n lawm thu a sawi bawk.

He skill upgradation training programme hnuaia beautician zirna turah hian zirlai 34 an inziak lut a. Thla li course tur niin, zirna eng kim a thlawn vek tur a ni a; tha taka zir chhuakte chu certificate tha tak pek an ni bawk ang.