No.2950/2021-2022

Aizawl Sahmulphah thla ni 11, 2021: November thla chhunga Special Summary Revision of Electoral Roll, 2022 kalpui mek puala District Election Office, Lawngtlai leh Lawngtlai District Football Association (LDFA) Futsal Committee te tang kawp huaihawt SSR 2022 Futsal Tournament chu nizan atang khan Rorelliana Chinzah Futsal Ground, Lawngtlai Vengpuiah khelh tan a ni.

SSR 2022 Futsal Tournament hawnna hun buatsaiha khuallian, Lai Autonomous District Council (LADC)-a Executive Member i/c Sports & LDFA President Pu C. Hrangthianga chuan infiamna chi hrang hrang chu eizawnna tling a nih thu sawiin, Futsal tournament-a telte pawh hun khawh ral nana khel mai lo va, tih tak takna nen hma sawn tuma khel turin a chah a. Infiam mi tan taksa hriselna vawn that leh ruihhlo laka fihlim a pawimawh tih a sawi a. Sawrkar hma laknaa Lawngtlai District chhunga sports infrastructure-a hmasawnna tur hmachhawp awmte tar langin, infiam mite tan kawl a eng zel dawn a ni, a ti.

Tournament hawnna hun hi Futsal Committee Vice Chairman Pu Rohimliana'n a kaihruai a. Treasurer Pu Lalzuienga'n hunserh hmangin, Secretary Pu C. Lalhmachhuana hnen atangin report ngaihthlak a ni a. Election Officer Pi B. Malsawmtluangi leh SHADE DRP Pi C. Malsawmchhungi te'n thu sawiin, Lawngtlai DIPRO & SVEEP Nodal Officer Pu C. Lalhruaitluanga kaihhruaiin "SVEEP Thutiam" chham rual a ni a. Lawngtlai Additional SP Pu C. Lalruatkima'n player-te intiamkamna neihtirin, Khuallianin ball chhuihin tournament hi a hawng nghal a ni.

He SSR 2022 Futsal Tournament hi kum 16 chin chung lam a duh apiang tel theiha buatsaih a ni a. India khua leh tui kum 18 tling chinte electoral roll-a an inziah luh ngei theih nana hma lakna chi khat a nih angin tel tur zawng zawngin an kum zat tihchianna an theh luh vek a ngai a. Kum 18 tling chin, Voter ID Card nei lo tan chuan tel theih loh tih niin, Form 6 hmanga anmahni bialtu Booth Level Officer (BLO) hnena electoral roll-a luh dilna an theh lut ngei tih finfiahna an neih erawh chuan tel phalsak an ni chauh dawn a. Form 6 theh lut zinga in-report hmasa ber hnenah lawmman pek tum a ni bawk.

He tournament-ah hian team 31 telin, knockout-a khelh a ni dawn a. November ni 16, 2021 zanah final leh a kharna hun buatsaih tum a ni.