3436/2022-2023

Ramtuk thla ni 1, 2023: Chhiat rupna lian tham lo thlen thulha felfai zawka chet lak dan tur enchhinna, "Mock Exercise" chu Mizoram pumah naktuk, February ni 2, 2023 khian buatsaih a ni dawn a. Hemi atana ṭul leh pawimawh inhrilh hriatna hun chu vawiin khan Lawngtlai DC Conference Hall-ah Lawngtlai District Disaster Management Authority (DDMA) Chairman, Bawrhsap Pu Amol Srivastava hovin hman a ni.

Chairman Pu Amol Srivastava chuan Lawngtlai District Disaster Management Plan ṭha tak siam a nih thu leh District Emergency Operation Centre (DEOC) pawh function-tir reng a nih thu sawiin, chhiatna thlen thulha hmang ṭangkai thei turin official leh mipuiin an hriat chian a ṭul tih a sawi a. Chhiat rupna chu eng lai pawha thleng thut thei a nih avangin chuti ang huna fel taka che thei tura inpeih leh inralrin reng a ṭul thu sawiin, mipui pawhin he'ng huna tih tur leh tih loh turte an hriat chian a pawimawh a, inzirtir reng a ṭul a ni, a ti.

Vawiin meeting-ah hian District Administration official-te, Mock Exercise atana Site Observer leh Incident Commander turte, medical lam ai awh leh Quick Response Team ai awhte an tel a. Mock Exercise buatsaih huna chet lak dan tur hrang hrang an sawi ho a ni.

Ruahman lawk dan chuan naktuk, February ni 2, 2023 (Ningani) hian Mizoram district headquarters zawng zawngah lirnghing lo thlen thulha felfai zawka chet lak dan tur enchhinna, "Mock Exercise on Earthquake Disaster" hi neih tur a ni a. Hmun hrang hrang panga (5) - zirna in, sawrkar pisa, mipui chenna, bazar leh damdawi inah te mock exercise hi buatsaih tura tih a nih angin, Lawngtlaiah chuan Government Region Higher Secondary School; Deputy Commissioner Office; SDC Quarters, Electric Veng; Chandmary Bazar leh District Hospital Lawngtlaiah te buatsaih a ni dawn a. Chawhma dar 10:00-ah Lawngtlai Bawrhsap pisa aṭangin ralkhel dar (siren) tihrik niin, mock exercise hi kalpui zui nghal a ni dawn a. Mipuite chi-ai lo turin DDMA chuan ngenna a siam a ni.