Lok Sabha Inthlanpui 2019 lo awm tur atana inbuatsaih nana electronic voting machine (EVM) hman dan leh enkawl dan a taka inzirtirna (training & awareness) atana hman tur EVM (control unit leh ballot unit) leh voter verifiable paper audit trail (VVPAT) khawlte chu a dahna hmun District Election Officer (DEO) strong room atangin vawiin khan lak chhuah a ni.

Training-naa hman tur EVM leh VVPAT hi set 15 lak chhuah a ni a. Lak chhuah lai hian DEO Pi Shashanka Ala IAS, Election Officer Pu Lalremruata Sailo MCS leh political party ai awhte an awm a. Lak chhuah tur hi political party ai awhte'n an duh duh thlang chhuakin, fel taka chhinchhiah vek a ni a. Mamawh huna hman atan warehouse-ah dah luh niin, strong room hi kalh fel leh nghal a ni.

Lok Sabha Inthlanpui 2019 atana Lawngtlai District-a inbuatsaihna chu chak taka kalpui chhoh zel a ni a. Mipuite'n EVM chungchang an hriat chian theih nan leh vote an thlak chhin theih nan DEO office leh District chhung block 4-a Block Development Officer office-ahte static EVM hun tur niin, mobile awareness van hmanga District chhung hmun hrang hrang fan kual tum a ni bawk.