Vawiin khan Lawngtlai District Election Officer Dr A. Muthamma IAS, Lawngtlai Bawrhsap hovin a office chamber-ah SVEEP special drive 2017 neih tur chanchinbu mite hnena hrilhfiahna hun hman a ni.

District Election Officer Dr A. Muthamma chuan India khua leh tui kum 18 tling chinte chu Electoral Roll-a an chuan ngei a tul a, tun tum SVEEP special drive-ah hian kum 18-21 inkar roll-a la chuang lo zawng zawng chu thun vek tum a ni, a ti a. Chumi a nih theih nan chuan zau taka puanzar a tul tiin, thu thar theh darhtute chu thawh hopuiah a sawm nghal.

Election Officer Pu Lalrinawma MCS chuan SVEEP special drive 2017 kalpui dan tur tlangpui a sawi fiah a. Hlawhtling taka hlen chhuah a nih theih nan press mite chu an pawimawh hle dawn a ni, a ti bawk.

Election Commission-in a ruahman lawk angin SVEEP (Systematic Voters' Education & Electoral Participation) special drive 2017 hi July thla chhung hian neih tur a ni a. India khua leh tui kum 18-21 inkar roll-a la chuang lo thun tharna tur a ni. Hemi atan hian ERO/AERO leh BLO te chu June thla chhungin training pek vek an ni ang a. Roll-a thun thar duhte chuan bialtu BLO hnen atanga Form 6 la chhuakin, dik taka dah khah hnuah birth/education certificate photocopy leh passport size thlalak nen theh luh leh tur a ni. Form 6-a luh dilte chu hearing neih hunah original certificate nen inlan ngei tur a ni.

SVEEP special drive 2017 atan hian Lawngtlai District Election Branch chu nasa taka inbuatsaihin, vantlang hmun pawimawh laia zar tur leh office pawimawha dah tur banner leh pamphlet eng emaw zat an buatsaih a. July ni 8 leh ni 22 hian polling station tinah BLO-te kaihhruaiin Form 6 khawn khawm nan special camp nei vek tura ruahman a ni bawk.