Vawiin khan Lawngtlai DC Conference Hall-ah Bawrhsap Dr Arun T., IAS hovin Lawngtlai District Health Department leh Social Welfare Department hnuaia thawktute’n Lawngtlai District chhung khaw tina Village Health, Sanitation and Nutrition Committee (VHSNC) din a, tha taka kalpui a nih theih dan tur an sawi ho.

He hun kaihruaitu Lawngtlai Bawrhsap Dr Arun T. chuan hriselna chu mihring nuna thil pawimawh ber a ni a, hemi kawngah hian a enkawltu department mai bakah, mi tinin rilru kan sen a ngai a ni, a ti a. Khawtlang mipui hrisel nan health department leh social welfare department-in mahni zawnah hma an la ve ve a, a hranga mahni thawh ang anga thawk mai lo va, thawh ho dan felfai zawk zawn chu hmasawnna awmze nei zawk a awm theih nan thil pawimawh tak a ni, a ti a. Chu vanga meeting pawh chu koh a nih thu a sawi.

He thut khawmah hian health department leh social welfare department hnuaia village health committee dinna tur dan awm ve ve chu, a hranga din lovin, Village Health, Sanitation and Nutrition Committee (VHSNC)-ah chhun fina awmze nei zawka hma lak a nih theih dan tur sawi ho a ni a. VHSNC-ah hian hmeichhe VC member chairman-na hnuaiah ASHA chu secretary niin, anganwadi worker leh tlawmngai pawl ai awhte chu member-ah an awm ang a. Thla tin vawi khat tal khawtlang hriselna kawnga hma lak dan tur ngaihtuaha thu khawmin, ASHA leh anganwadi worker-te hna thawh dante an vil thin dawn a ni.

He thut khawmah hian khawtlang hrisel nana department pahnihin hna an thawh dan chu a bul thuta inhriatpui ve ve a, a tir atanga thawh ho chhoh zel chu kawng tha ber leh hlawk ber tur a nih thu pawh tarlan niin, hemi kawngah hian health department hnuaia ASHA leh health worker-te leh social welfare department hnuaia anganwadi worker-te chu programme hrang hrang kalpuinaah tha takin thawk ho zel se, tih a ni a. Nu, naute, naupang leh tleirawl hriselna kawnga hma lakna hrang hrangah pawh a theih anga thawh ho zel ni se, tih a ni bawk.