2572/2024-2025

Dated Lawngtlai, 17th October 2024 : Vawiin chawhma dar 11 khan National Tobacco Control Programme (NTCP)  Lawngtlai District bultumin "Tobacco Free Youth Campaign 2.0"  hawnna DC Conference Hall-ah  neih a ni a. Pu Cheemala Siva Gopal Reddy, IAS, District bawrhsap leh Chairman, District Level Coordination Committee on Tobacco Control, nibawk chuan campaign hawnna neiin, District Level Coordination Committee on Tobacco Control te an thutkhawm nghal a ni.

Pu Cheemala Siva Gopal Reddy, IAS, chuan Lawngtlai District mipuite vaihlo, zuk leh hmuam laka an lo fihlim theihna turin  'Tobacco Free Youth Campaign 2.0' chu  tangkai taka hman tura a hawn thu a sawi a. Mizoram chu zuk leh hmuam bakah vaihlo atanga siam ei/in tamna a ni tiin, Indian Council of Medical Research (ICMR) tarlan danin Mizorama cheng za zela 77 te chu zuk leh hmuam  ti mi an ni tih  a sawi a. Vaihlo chu cancer thlentu ber a nih avangin, Zuk leh hmuam tih avanga cancer vei  tam em emin, Mizoram chu Cancer khawpui (Cancer Capital) tih hial a ni a, hei hi thil lungchhiatthlak tak a ni, a ti.

Pu Cheemala Siva Gopal Reddy chuan thalaite zinga zuk leh hmuam, vaihlo atanga siam ei/ in an tam chhan ber chu hun awl an ngah lutuk vang nia a hriat thu a sawi a. Hun awl hmang tha turin theihtawp chhuah a tul a, sawrkar department hrang hrang, Kohhran leh Tlawmngai Pawl ten hmalak tlân a tul hle a ti. Thalaiten hun awl an hman  tangkaina  turin Education Department- ten 'Career guidance' leh 'Quiz Competition'  buatsaihin, Art & Culture, LADC- te pawhin hnam zia rang hmanga inelna ang chi pawh siam thiam a tul hle ang a ti a.  Lawngtlaiah infiamna hmunhma  tha tak tak a awm a, hengte hi thalaite tana tangkai zawka  hmang turin Sports Department  pawh hma la turin a chah.

Bawrhsap chuan vaihlo, zuk leh hmuamin sum leh pai tam tak  ei ralin, chhungkaw khawsak pawh a ti harsa thin hle tih a sawi  a. Nu leh pa, kum upa lam te vaihlo  nghei tir tura hma lak a that viau rualin, thangtharte hmakhua ngaia  hma lak a pawimawh hle a ti a. Naupangte an nih atanga zuk leh hmuan ti lo tura enkawl an nih chuan an puitlin hnu thlengin an fihlim thei dawn a ni, a ti.  Sawrkar Office leh Zirna In hrang hrangah zuk leh hmuam tih chu khap tlat a nih tu a tarlang a. A bik takin zirtirtu zingah vaihlo laka fihlim lo an tam thu sawiin, naupangte entawn ber an nihna hria a, zuk leh hmuam ti lo tura tan la thar turin zirtirtute a chah a. Sawrkar department hrang hranga hotute pawh Office Compund- chhunga zuk leh hmuam ti lo turin a chah bawk. Zuk leh hmuam do kawngah  sawrkarin nasa taka hma a lak thin thu sawiin bawrhsap chuan vawiina hawn tak 'Tobacco Free Youth Campaign 2.0'  hlawhtlinna turin mi tinin mawhphurhna an nei a ti. Pu Cheemala Siva Gopal Reddy chuan  Vaihlo, zuk leh hmuam laka Lawngtlai khawpui a lo fihlim zawk theih nana theihtawp chhuahpui turin kallhawmte leh Lawngtlai mipuite a sawm nghal.

Pu R. Lokeshwaran, IPS, Superintendent of Poice, Lawngtlai, pawhin thu sawiin, Cigarettes and Other Tobacco Products Act, (COTPA) 2003 ken kawh kawngah Police Department- ten theih thawp an chhuah reng thu a tarlang a. A bik takin, Zirna In atanga 100 m huamchhunga vaihlo kaihnawih zuar an awm leh awm loh chu uluk zawk endik thin a nih thu a sawi  a. Mipui vantlang hmuna meizuk chungchangah  khauh zawk a hmalak a nih tur thu a sawi bawk. Dr. David Zothantluanga, Sr. Chief Medical Officer chuan thutawi sawina neiin,  Mizoramah za zela 59 in zuk leh hmuam an tih mek thu tarlangin, hei hian Mizoramah nasa takin cancer a thlen phah a ni,  a ti a. Zuk leh hmuam laka thangtharte an fihlim theihna turin theitawp chuah zel ang u tiin a sawm.

District Level Coordination Committee on Tobacco Control-  thutkhawmna neih nghal niin, "Tobacco Free Youth Campaign 2.0" kalpui dan tur sawiho a ni a. Lawngtlai District- ah 'Tobacoo Free Vilage' neih ve ngei ni se tih an rel a, hemi atan hian Chawnhu khua chu Tobacco Free Village- ah puan a ni.

Vawiin "Tobacco Free Youth Campaign 2.0"  hawnna ah hian District Level Coordination Committee on Tobacco Control Member - te an tel kim tha hle a. Dr. Christine Chhuanmawii, District Consultant, NTCP, Lawngtlai chuan 'Tobacco Free Youth Campaign 2.0" Lawngtlai district- a kalpui dan tur tlangpui leh National Tobacco Control Programme (NTCP) hmalakna hrang hrang tarlanna a nei a, Pi H. Vanlalmuansangi, Social Worker, NTCP chuan lawmthu sawina neiin hun a khar.