No.4390/2021-2022

Aizawl Vau thla ni 24, 2022: Vawiin kha World Tuberculosis (TB) Day niin, Lawngtlaiah chuan CMO Conference Hall-ah he ni pual hian hun hman a ni a, Lawngtlai East Bialtu MLA, Agriculture Development Board Vice Chairman Pu H. Biakzaua chu Khuallian a ni.

Pu H. Biakzaua chuan ngawr natna (TB) chu khawvela thihna thlentu natna hluar berte zinga mi a nih thu sawiin, enkawlna ṭha tak a awm tawh chunga vei thar leh thihpui an la tamzia ngaihtuahin TB ûm bo tûra hma laknaah tha thlah a thiang lo tih a lang chiang hle a ni, a ti a. India ramah kum 2025 hmaa TB natna um bo tum a nih avângin Mizoram sawrkar pawhin a ngai pawimawh hle tih sawiin, TB chungchang inzirtirna leh a vei zawn chhuah hna kalpui reng a nih thu leh District level committee hrang hrang din a, tha thlah lova hma lak reng a nih thu a sawi.

Pu H. Biakzaua chuan Lawngtlai District-a TB um bo tura thawktute inpekna leh ṭhahnem ngaihna chuan ram hruaitu a nih anga chona thar a siamsak thu sawiin, Lawngtlai District chhunga TB um bo tura hma laknaa a ṭul apianga hmanah ₹ 10,000/- (cheng sing khat) chu thawktute hnenah a hlan nghal a ni.

He hunah hian Pu H. Biakzaua chuan Lawngtlai District-in hriselna kawnga hma a sawn theihna tur sawrkarin a ngai pawimawh hle tih sawiin, clinic centre eng emaw zat hawn belh tura ngenna tihlawhtlinga Lawngtlai khawpui chhungah clinic thar pali leh Sangau Block chhungah clinic thar pasarih hawn phalna tihchhuah a nih tawh thu te, District khawthlang lamah pawh phalna hmuh thuai beisei a nih thu te sawiin, sawrkar chungah lawm thu a sawi nghal bawk.

Vawiina Lawngtlaia World TB Day hman hi Lawngtlai District TB Officer Dr S. Thaizi chuan kaihruaiin, Lawngtlai District Chief Medical Officer (CMO) Dr LP Malsawma'n kal khawmte lawmna thu a sawi a. Senior Treatment Supervisor Pu James Zarzoliana hnen aṭangin an hma lakna leh hlawhtlinna (performance & achievement report) ngaihthlak a ni a. World TB Day 2022 puala inzirtirna poster buatsaihtu naupang pali hnenah lawmman pek niin, RNTCP hnuaia ngawr natna enkawl dam tawh, TB champion Rev. V. Suikharliana hnen aṭangin TB a hneh dan chanchin ngaihthlak a ni a. District Hospital Lawngtlaia Medical Officer Dr Paul Lalchungnunga'n lawm thu sawiin, hun khar a ni.

Kumin World TB Day thupui atan hian: "TB um bo turin i tha leh zung seng la, nun chhanhim rawh" (Invest to end TB: Save lives) tih hman a ni a. Vawiina Lawngtlaia hun hmanah hian Khuallian ṭawiawmtu LADC-a Executive Member i/c I&PR, etc. Pu Lalropuia Chinzah, Executive Member i/c Art & Culture, etc. Pu BN Thangpuia, Deputy Chairman Pu CL Lianzuala, Town Committee Chairman Pu Sanghuliana Mualchin leh MNF District Headquarters hruaitute, sawrkar official, VC leh tlawmngai pawl ai awh leh hriselna kawnga thawktute an kal khawm a ni.

India ramah kum 1962 aṭang khan National TB Control Programme (NTCP) hnuaiah TB khuahkhirh tura hma lakna kalpui niin, kum 2003 aṭangin Revised National TB Control Programme (RNTCP) hnuaiah ngawrh zawka hma lak a ni a. National TB Elimination Programme (NTEP) hnuaiah kum 2025-ah chuan India ram aṭanga TB um bo a nih theih nan beihpui thlak mek a ni.

Lawngtlai District-ah TB vei hmuh chhuah kum 2018-ah mi 118, kum 2019-ah mi 128, kum 2020-ah mi 94, kum 2021-ah mi 71 leh kum 2022 kum kal mekah mi 26 an awm a. Kum 2018-ah enkawl dam mi 117 leh thihpui mi 1, kum 2019-ah enkawl dam mi 125 leh thihpui mi 2, kum 2020-ah enkawl dam mi 89 leh thihpui mi 3 leh kum 2021-ah enkawl dam mi 68 leh thihpui mi 2 awmin, tunah enkawl lai mek mi 26 an awm a ni.

TB damdawi ei ṭhat loh vang leh chhan dang vanga damdawiin hna a thawh ṭhat theih lohna Multidrug Resistant TB (MDR-TB) damlo Lawngtlai District-a mi 13 hmuh chhuah tawhah mi 11 chu enkawl dam tawh niin, mi 1-in a thihpui a, isolation ward-a enkawl lai mek mi 1 a awm a ni.

District TB official-te chuan TB hrik en leh damlo enkawlna chu sawrkarah a thlawn vek a nih bakah, damdawi ei chhung (thla ruk chhung) zawng thla tin ₹ 500/- pek an nih thu leh inenkawl zawh hnuah ₹ 750/- pek ṭhin an nih thu sawiin, TB chu enkawl hma a, ṭha taka damdawi ei chuan a dam hma a, harsatna nasa zawk a pumpelh theih tih an sawi.

TB hi chuap TB (pulmonary) leh chuap pawn lam TB (extra pulmonary) tiin hlawm 2-a thliar a ni a. Chuap TB, an khaka hrik hmuhte chauhvin mi dang kai chhawng theia ngaih niin, he'ngte pawh hian ni 10-14 chhung damdawi an ei hnu chuan mi dang kai chhawng thei tawh lo tura ngaih a ni a. TB veite thinhrikna awm ṭhin chu hriat chian tawk loh vang a nih thu he hunah hian tar lan a ni.