Vawiin khan Nehru Yuva Kendra (NYK) Lawngtlai leh Lawngtlai College Veng Volleyball Club tang kawp chuan Govt Southern Standard Middle School, College Veng-ah thalai pawl tihchakna tur leh infuih tharna (youth club development programme) an buatsaih a. Youth club member eng emaw zat kal khawmin, LADC-a Executive Member i/c LAD Pu H.Chhuanawma'n a hmanpui.

Pu H.Chhuanawma chuan NYK-in thalaite tha chakna hmanga khawtlang siam that lam an kalpui thin chu lawmawm a tih thu a sawi a. Ram leh khawtlang hmasawn nan thalaite'n mawhphurhna lian tak an nei a, thalaite thlekna lam lamah khawtlang pawh a thle ve zel a ni tiin, ram leh hnam tana kan tih tur kan chian theuh chuan ramin hma a sawn ngei ngei ang, a ti. Youth club-te chuan an din chhan an hriat chian a, hma sawn zel tura tan an lak a pawimawh thu sawiin, zirna, faina, thianghlimna leh hriselna kawnga khawtlang tana thawktu tangkai tak ni turin a fuih bawk.

He hun hi College Veng Volleyball Club Finance Secretary Pu Vanlalhmuaka'n a kaihruai a. BCM Lawngtlai South bialtu Pro Pastor Zirsangzuala Hrangchal chuan hunserh hmangin, NYK Lawngtlai Youth Co-ordinator Pi Mercy Sellate chuan youth club development programme buatsaih a nih chhan leh a tum tlangpui a sawi fiah a. Lawngtlai DIPRO Pu C.Lalhruaitluanga'n "khawtlang hmasawn nana thalaite mawhphurhna" tih sawiin, NYK Lawngtlaia Multi Tasking Staff Pi K.Lalhmachhuani chuan lawm thu sawiin hun a khar a ni.

Attachment

  • Loading attachment...