1623/2023-2024

2023 Thlazing ni 23: Vawiin khan Lawngtlai DC Conference Hall-ah Lawngtlai Bawrhsap, District Education Committee Chairman ni bawk Pu H. Lalhmingthanga kaihhruaina hnuaiah September ni 5, 2023-a Teachers’ Day hman dan tur sawi ho a ni.

Chairman Pu H. Lalhmingthanga chuan India ram President hlui, zirtirtu ropui Dr S. Radhakrishnan-a pian champha phak September ni 5-ah Teachers’ Day chu lawm ṭhin a nih thu sawiin, zirtirtute pawimawhzia hriaa he ni hi ngaih pawimawh deuh deuh a ṭul thu a sawi a. Zirtirtute chawimawina ni a nih angin zirtirtute chawimawi nachang hriat a ṭul a, chutih rualin zirtirtute pawhin chawimawi phu-a hna an thawh a ṭul bawk a ni, a ti.

He hunah hian Lawngtlai District Education Officer Pi R. Lalnunthari hnen aṭangin kum danga Teachers' Day hman dan report ngaihthlak a ni a. Kum dang ang bawkin he ni hi Lawngtlai District chhunga zirna in zawng zawngin anmahni remchan dan angin anmahni sikul ṭheuhah hmang leh se, tih a ni a. Hemi ni hian Mizoram Sawrkara School Education Minister hnen aṭanga Teachers' Day thuchah chu school tinah chhiar chhuah ni se, tih a ni a. Hemi bakah hian Lawngtlai Bawrhsap Pu H. Lalhmingthanga pawhin local cable TV kal tlangin thuchah sawi se, tih a ni a. Hemi nia social media kal tlanga theh darh turin Teachers’ Day pualin flyer/poster buatsaih ni se, khawpui chhung hmun parukah Teachers' Day banner tar ni bawk se, tih a ni.

State Level Working Committee-in a lo ruahman angin kumin hian National Foundation of Teacher Welfare Fund atan zirtirtu pakhat hnenah ₹ 200/- ṭheuh khawn ni se, tih a ni a. He'ng sum tling khawmte hi zirtirtu damlo leh harsatna tawkte ṭanpuina atan hman a nih ṭhin thu ngaihthlak a ni bawk.

Vawiin meeting-ah hian sawrkar official-te, zirtirtu inzawm khawm pawl hrang hrangte, zirlai pawl, tlawmngai pawl leh District MJA ai awhte an tel a ni.