Nimin khan Kolasib District Legal Services Authority buatsaihin District Court, Kolasib-ah Mahatma Gandhi National Rural Employment Guarantee Programme (MGNREGP) chungchang zirtirna, Awarness seminar neih a ni a. Kolasib District chhung khaw hrang hranga VCP theuhte he hunah hian an tel a ni.

 

 

           
Chawhma-ah he seminar hi Pi Lianhmingi Pachuau, Project Director, DRDA chuan a hawng a. Thu sawiin Kolasib District ah NREGS hi hlawhtling taka kalpui mek a niin Job card nei ten ni 80 chuang tur financial year chhungah an inhlawh tawh a. Ni 100 an inhlawh hman ngei ang, a ti.
           
Dr. H.T.C. Lalrinchhana, Civil Judge I chuan MGNREGP hman dan zirtirna pe-in Mizoram bika Act leh scheme kalpui dan tur chipchiar takin a sawi a. Job card nei reng rengin V.C. ah hnathawh tur a dil hmasa phawt ang a, chumi hnuah V.C. in thawh tur a kawhhmuh ang a, tlangau hmanga puanzar ringawt chu Act leh scheme in a kawhhmuh dan a ni lo a ni, a ti a ni. Pu Malsawmdawngzuala, Civil Judge II chuan NREGP leh a Act chungchang zau takin zirtirna a pe bawk a ni.
             
PU H. Bazirama, Conciliator, Lok Adalat kaihhruai Awarness seminar-ah hian dan ang taka inhlawhna kalpui dan tur sawi ho a ni a. Inhlawhfa ten kawng an lai zauvin a ram neitute biak rawn hmasak phawt tur a ni tih tarlan a ni a. Dan-in a phut angin job card nei inhlawhfa chuan ni khatah darkar 8 a thawk tling ngei tur a ni a. Work site facility- tui thianghlim in tur nau awmna leh daihlim te siam ngei a tul thu pawh tarlan a ni bawk. Mumal zawka inhlawhna hi kalpui a, hnathawh hun chhung bituk thawh tlin ngei leh thawk manglova hlawh lak mai thenkhatin an tum chu mizote hnathawh dan kalphung tichhetu a nih an hlauh thu pawh seminar ah hian an sawi lang bawk a ni.
             
Chawhnu lama Lok Adalat neihah job card nei pakhatin lungawi lohna a thehluh chu dan anga thu remsak nghal a ni.