No.7302/2020-2021 

Mizoram Youth Commission, Planning & Programme Implementation Department leh Commerce & Industries Department-te tangkawp buatsaih Covid-19 vanga state danga hnathawk lo haw te puala Entrepreneurship Development Training, ni thum awh kharna hun chu nimin khan LGC Multipurpose Hall-ah buatsaih a ni a, HPC Vice Chairman Pu Lawmawma Tochhawng chu khuallian niin training chhuak te certificate a hlan.

HPC Vice Chairman Pu Lawmawm Tochhawng chuan Covid19 hripui leng vanga state dang atanga kan thalai lo kirte tana mahnia eizawnna bul tan dan inzirtirna hun buatsaih a ni chu lawmawm a tih thu a sawi a. Covid-19 hrileng avanga phai leh hmun dang atanga hnathawhna rawn kalsana Mizorama rawn let thalai kalkhawmte chu ngaihsanawm a tih thu sawiin HPC Vice Chairman chuan phai lama an hnathawhnaa an thil zirchhuah leh an thiamna te chu hmang tangkai thiama rilru beidawng mai lova an eizawnna kawnga hma la turin a fuih a. Entrepreneurship lama hma la duhte sawrkarin a thlahthlam dawnlo a ni tiin kum 2019-a HPC Lunglei hmalaknaa entrepreneurship intihsiakna hlawhting tak lo neih tawh Leitlangpui Rahbi Micro Start Up Capital Competition pawh nei leh thuai tura inpuahchahna a kal mek thu HPC Vice Chairman chuan a sawi a. EDP training chhuak te chu he intihsiakna ah hian lo tel ve ngei turin a sawm a ni.

Training-ah hian Entrepreneurship awmzia leh Business lama bul tan dawna thil pawimawhte zirtirna chu Mizoram sawrkar Entrepreneurship Development Scheme hnuaia Master trainer pathum - Pi Agnes L Khawlhring LGC, Pi C.Lalremruati DIPRO leh Pu R.Lalnunthara, HATIM ten an nei a ni. Hawnna inkhawm hi Pu R. Vanlalsanga, SDIO, DIC in a kaihruai a ni.