No.4235/2021-2022
Aizawl, the 11th March 2022 : Public Works Department chuan a hnuai ami ang hian Lengpui Airport hnathawh mek “Improvement/ Upgradation of operational/ non-operational facilities of Lengpui Airport under NESIDS” slab chim chungchangah a hnuai ami ang hian sawifiahna a chhuah:
Vanduaithlak takin Ni 10.3.2022 tlailam dar 4:50 khan Lengpui Airport Terminal Building sira Baggage Make-up area sak mek chu a chim hlauh mai a, amaherawh chu thi leh hliamna lutuk tumah an awmlova vanneihthlak kan ti hle.
Baggage Make-Up area hi a vaiin 520.02sq.m a ni a. Heta tang hian 238.50sq.m hi slab chhun zawh tawh a ni a. A bang 281.50 sq.m hi chhun lai mekin a chim ta a ni. He slab chhun lai chim chhan ber ni a lang chu lei atanga slab san zawng hi 6.00mtrs lai a sang a ni a, chu chu form work/shuttering chhawng thum a mau leh thing hmanga do a ni a, slab chhun lai a tihmuk nana vibrator an hmanlaiin a dona mau thenkhat hi a pelh palh a, chu chuan a slab chhunlai 281.50sq.m hi a tlakpui ta a ni. Dt. 11.3.2022 zing dar 8:30 khan a hmunah Contractor leh Engineer ten an enho nghal a, tha taka siamtha leh tur a hmalak nghal niin Contract Agreement ang ngeiin Contractor hi sum sen belh awm lova siam tha leh tura hriattir nghal a ni.
Hetianga beisei loh taka thil alo thleng ta mai hi Mizoram Public Works Department chuan pawi kan ti takzet a ni.
