4495/2025-2026

Dated Aizawl, 16th February 2026: Vawiin khan Sawrkar laipui, Ministry of Corporate Affairs Secretary Pi Deepti Gaur Mukerjee leh officer rualte  chuan  Mizoram Secretariat Conference Hall, MINECO-ah Mizoram Sawrkar hotute kawmin Prime Minister’s Internship Scheme (PMIS) chungchang sawi hona hun an hmang. He hun hi Labour, Employment, Skill Development & Entrepreneurship Minister Pu Lalnghinglova Hmar-in kaihruaiin, Chief Secretary Pu Khilli Ram Meena chu Co-Chairman a ni.

LESDE minister Pu Lalnghinglova Hmar chuan Prime Minister’s Internship Scheme (PMIS) thil tum tlangpui sawiin, he scheme kaltlang hian thalai kum 21-24, High School leh a chunglam College leh ITI zirlaite'n India ram company lian tak takahte internship an tih theihna tur leh chumi hnua an thawh chhunzawm zel theihna tur kawng dappui tum an nih tur thu a sawi.

Ministry of Corporate Affairs Secretary Pi Deepti Gaur Mukerjee chuan thalai tam tak ten lehkha an zir zawhah hna zawn ngaihna an hriat loh thin thu sawiin, 'company leh industry lianahte thawhna tur leh thawh dan kawng kalhmangte an hriat theih nan PMIS chu a pawimawh hle a ni' a ti a. Mizo thalai, a tam thei ang ber ten lo hlawhtlinpui ngei se a duh thu a sawi bawk. Hmalak dan tur hrang hrangte rel ho niin Awareness Campaign zau zawka buatsaih te, Indian Institute of Corporate Affairs (IICA), Institute of Chartered Accountants (ICA)  leh Institute of Company Secretaries of India (ICSI) te nen thawhhona tha zawk neih te, Mizo thalaite’n company lian tak takahte an thawhtheihna tur leh zir chunga an thawh theih dan turte pawh dap zel ni se tia rel a ni bawk.

Vawiin thutkhawmna-ah hian sawrkar laipui, Ministry of Corporate Affairs hnuaia Eastern Region-a Regional Director Rakesh Tiwari te, Deputy Secretary Dr. Navdeep Singh Suhag leh Assistant Director Tejaswini Tabhane te an lo kal bawk a. Mizoram State Sawrkar hotu lian GAD Principal Secretary Pu Sudhir Kumar te, H&TE Commissioner & Secretary Pu K. Lalthawmmawia te, LESDE Secretary Dr. Lalhriatzuali Ralte te bakah Mizoram chhunga phailam company lian hotute leh mi pawimawh dangte telin, Indian Institute of Chartered  Accountant (IICA), Institute of Cost Accountants (ICA) leh Institute of Company Secretaries of India (ICSI) atangin an lo tel bawk a, Nagaland leh Tripura atang pawhin Sawrkar hotute’n online-in an rawn zawm ve bawk a ni.