1557/2024-2025

Aizawl dated 13th August 2024: Vawiin chawhma khan SAD Conference Hall-1, MINECO ah Ministry of Labour & Employment hnuai a Employees’ State Insurance (ESI) Act, Mizoram a chak zawk a kalpui a nih theih nan ‘1^st Meeting of State Insurance Corporation Regional Board Mizoram’ neih a ni a. Pu Lalnghinglova Hmar, Labour, Employment, Skill Development and Entrepreneurship Department chuan hun kaihruaiin Pu Robert Guite, Regional Director, ESIC, NER, Dr. Richita Biswas, Medical Commissioner-East and North East Zone-te chuan Mizoram a hmalakna kalpui tawh dan leh hmachhawp tarlanna hun an hmang a. Mizoram Private School Owners Association, Mizoram Non-Government Hospital Association, Automobile Workshop Owners Association, NTUM, FOTUM, CITUM leh LESDE Department-a hotute he hun ah hian an tel a ni.

Hun kaihruaitu Minister Pu Lalnghinglova Hmar chuan Employees’ State Insurance Corporation hnuai a Private Institution hrang hranga thawktute tan  hamthatna tha tak tak ruahmanna awm chu a tak a hmang tangkaitu nih theuh tum turin kalkhawmte a chah a. Minister chuan ESIC hnuai a kan mi chhawrte tan a hamthatna awm thei; dam lo inenkawlna te, hnathawhna a inhliam palh avang a chhawmdawlna te, vanduaina avanga a ram tui lei lo a awmte tanpuina thleng a huam avangin hnathawktute leh a chhawrtute tan thil pawimawh tak a nih thu a sawi a. ESIC hnuai a hamthatna chang thei hnathawk tam thei ang ber an inziah luh theih nan vawiin a pawl hrang hrang hruaitute lo kal chu thawhho pui ah a sawm a ni.

Pu Robert Guite, Regional Director, ESIC, NER, Dr. Richita Biswas, Medical Commissioner-East and North East Zone-te tarlan danin ESIC hi Aizawlah kalpui mek a ni a, kum 2022- 23 chhung khan mi 1960 an inziak lutin vawiin thleng hian mi 2634 an inziak lut tawh a. India ram pum ah ESIC hian Hospital 161, Dispensary 1574, Medical College 13 a thawhpui mek bawk a, Insured Person (IP) fate tan ESIC Medical College 6-ah seat reservation a awm thu tarlan a ni bawk.

Thutkhawm a tarlan danin Employees' State Insurance (ESI) Act chu Aizawl Municipality huam chhung ah December ni 1, 2015 atang khan kalpui tan a ni a. Branch Office hi February ni 8, 2016 ah hawn niin tun ah hian R.Z. Annex Building, House No. A-107/E, 4th Floor, Zodin Square, Tuikual South, Aizawl - 796001, Mizoramah Branch Manager leh Staf-te nen kalpui a ni. ESI Dispensary pawh Zaluta Building, 1st Floor, Venghlui (Near Treasury Square), Aizawl-796001 ah hawn a ni.

ESI Dispensary, Aizawl leh damdawiin/diagnostic centre inthlunzawm te chu:

1)        Synod Hospital, Durtlang

2)        State Referral Hospital, Falkawn

3)        Aizawl Adventist Hospital, Zotlang

4)        Nazareth Hospital, Chaltlang

5)        Trinity Diagnostic Centre, Zarkawt

6)        Genesis Laboratory, Dawrpui

ESI hnuai a inziak lutte'n heng damdawiin/diagnostic centre-ah hian a thlawnin treatment (OPD/Admit/Tests chi hrang hrang) an dawng thei a. ESI Dispensary atangin heng damdawiin ah te hian a tul dan a zirin thawn thin an ni. Employees' State Insurance Corporation (ESIC) hi Ministry of Labour & Employment, Govt, of India hnuai a Statutory Body niin hnathawktute ESI Act 1948 in a huam te chu dam loh leh bawrhsawmna (Sickness) avangte, nau neih (Maternity) avangte emaw, hnathawhna a inhliam avangte, hnathawkna hmun a chetsualna avanga ram tui lei loa awmte (Disablement) leh hnathawhna avanga nunna chan chhungte (Dependent) harsatna chhawmdawl leh tanpuina tur ruahmanna hrang hrang a keng tel a ni.

ESI Scheme chuan eng sumdawnna pawh (Road Transport, Hotels & Restaurants, Cinemas, Newspaper, Shop, Educational/Medical Institution etc.), hnathawktu 10 (sawm) emaw a aia tam awmna te a huam vek a. Hnathawktu thlakhat a Rs. 21,000/- leh a aia tlem hlawhte tan he hamthatna hi dawn theih a ni.

ESI Act hnuai a hmathatna chang tur hian inziahluh hnu ah hnathawktuin a hlawh atanga za zel a 0.75 leh a chhawrtuin za zela 3.25 thlatin an chhun luh ve a ngai thung a ni. 

ESI Scheme hnuai a hamthatna leh hlawkna awm te chu a hnuaia tarlan ang te hi a ni:

1.        Sickness Benefit

2.        Medical Benefit

3.        Disablement Benefit

         a.        Temporary Disablement Benefit

         b.        Permanent Disablement Benefit

4.        Dependents' Benefit

5.        Maternity Benefit

6.        Confinement Expenses

7.        Funeral Expenses

8.        Rajiv Gandhi Shramik Kalyana Yojna (RGSKY), Unemployment Allowance

9.        Covid Relief Scheme (CRS)

10.      Atal Beemit Vyakti Kalyan Yojna (ABVKY) 

11.      MBBS Quota for ward of IP

ESI Act chungchang hrechiang duh te tan, Pu David Lalfakzuala, Assistant Director, Office Landline No. 0389-2913623 ah emaw Mobile No. 9999573504 ah emaw zawhfiah theih a ni.