1636/2025-2026
Dated Aizawl, the 27th September, 2025 : Zanin khan Labour, Employment, Skill Development and Entrepreneurship (LESDE) Minister Pu Lalnghinglova Hmar chuan Mizo Students' Union (MSU) General Headquarters buatsaih, LESDE UPSC Challenge Inter College Quiz Competition 2025 kharna hun chu Ignite Studio, Khatlaah khuallian niin a hmanpui.

Khuallian Pu Lalnghinglova Hmar chuan UPSC Challenge Quiz Competition buatsaih a ni chu lawmawm a tih thu leh Mizo thalaite’n UPSC hnuaia exam hrang hrangte hmachhawn tura chawhphur an ngaih thu a sawi a. LESDE Department hnuaia Mizoram Building & Other Construction Workers Welfare Board (MBOCWWB) chu mipuiin an hriatchian a, an inziahluh a, a hnuaia hamthatna an dawn theihte an hlawkpui theih nana he quiz hi an sponsor thu leh thalaite’n eizawnna rahbi an tuk theih nana an puihbawm thin thu a sawi a. Quiz-a telte chu an hmalam hun atan duhsakna a hlan bawk a ni.

Quiz Competition kharna hun hi Pu Zodinsanga, MSU General Secretary-in kaihruaiin, Pu B. Lalkhawngaihzuala, MSU President-in thu a sawi a. MSU chuan kum 2015 atangin he quiz hi a lo buatsaih tawh thin a, 2023 leh 2024 chu chawlin, kumin atangin an tan leh a ni, tih a sawi a. He quiz hi Mizo thalaite’n UPSC hnuaia exam hrang hrangte ngam taka an beih theih nana UPSC question pattern hrula buatsaih a ni a. Kum danga lo tel tawh, competitive exam-a hlawhtlinna chang tawhte chanchin sawiin, MSU chu zirlaite pui turin a inhawng reng tih a sawi a ni.

He inelnaah hian college 14 telin, Final Round-ah Govt. Hrangbana College, Mizoram Christian College leh Govt. Serchhip College-te an intum a. Khuallian Pu Lalnghinglova Hmar chuan a hnuaia tarlan ang hian lawmman a sem a ni.

1-na Mizoram Christian College (Rohmingliana Renthlei leh Remsiamkima) – Citation & Rs. 30000/-

2-na Govt. Serchhip College (Lawmsangzuala leh Lalhunmawii) – Citation & Rs. 10000/-

3-na Govt. Hrangbana College (Lalruatfela leh Lalbiakfela) – Citation & Rs. 7000/-

Champion team-te hian Mizoram Youth Commission (MYC) hnuaia Mission UPSC kaltlangin a thlawnin UPSC coaching an kal thei dawn a ni.