3636/2024-2025 

Aizawl, December ni 3, 2024: LESDE Minister Pu Lalnghinglova Hmar chuan vawiin khan Women Centre, Phunchawng ah kum 2024 batch puanthui zirchhuakte thlahna hun chu khuallian niin hun a hmanpui a.

Minister chuan Women Centre kaltlanga puanthui zirchhuak mi 300 chuang an awm tawh chu lawmawm tiin, 2024 batch atana zirchhuak mi 33 te chu a lawmpui thu sawiin, eizawnna tha taka an thil zirchhuah chu an chan ngei a beisei thu a sawi. LESDE Minister chuan eizawnna kawng hrang hrang tha tak tak a tam thu sawiin, sorkar pawhin skill hrang hrangah training a pek thin thu a sawi a. Women Centre in hemi zawnga hma a lakna chu fakawm a ti a ni. “Ei duh si, ei tur zawng peih si loh hi a zahthlak a ni” tiin Pu Lalnghinglova Hmar chuan eng hna pawh, a thawhchhuah zat a tam emaw, a tlem emaw, thawhchhuah neih hrim hrim a hlut zia a sawi. Chutihrual chuan, a bik takin mahni kutkawih eizawngte zingah chuan mahni lakluh zat tipung tura lian zawka hmalak a theih dan te zirchhuak tharte chu a hrilh a ni. Minister chuan ‘Life Skills’ thiam a pawimawh thu sawiin, chhungkaw enkawl danah pawh mahni tu leh fate’n life skill tha an neih theih nan a kaihruaiin thiam a tul thu a sawi bawk.

Vawiina programme ah hian zirchhuakte hnenah certificate leh memento hlan an nih bakah tefung hrang hrang hmanga zirlai titha thlanchhuah te hnenah Khuallian hian puan thui khawl a hlan bawk. Heng puanthui khawlte hi Usha Enterprise, Tuikual Pastor Bial Kohhran Hmeichhia leh Dawrpui Kohhran Hmeichhia ten an pek a ni. Vawiin hian Women Centre a thawktu chawl turte ngaihhruina thilpek hlan an ni bawk a ni. Amawii Hero chuan  Women Centre hnenah hian Scooty pakhat vawiin programme ah hian an hlan bawk a ni.

Women Centre atang hian zirchhuak 314 lo awm tawhin chung zinga 70% bawr vel chuan puanthui in ei an zawng tawh a. Vawiin hian zirchhuak 33 an awm belh leh ta a ni. He Women Centre 2024 Batch kharna inkhawm hi Vice Chairman Dr. Lalthansangi Fanai chuan kaihruaiin Generam Secretary Pi H. Lalfakmawii chuan inhmelhriattirna a nei a. Pi R. Lalrinpuii, Superintendent chuan report pe in Rev. V.L. Luaia Hrenleh hnen atangin thuchah ngaihthlk a ni bawk a. Zirlai aiawha thusawina a awm bawk a ni.