4867/2025-2026
Aizawl, the 17th of March, 2026 : Vawiin chawhma dar 10:00 khan Pu Lalnghinglova Hmar, Minister of State, Labour, Employment, Skill Development & Emtrepreneurship Department chuan Mizoram Mistiri Association (MMA) General Assembly vawi 11-na chu Synod Conference Centre, Mission Veng-ah a hmanpui a, MMA Dan Bu 2026 a tlangzarh.

LESDE Minister Pu Lalnghinglova Hmar chuan, "Mistiri te hi chhungkaw tana eizawngtu, chhungkaw chawm tura hnathawk tak takte kan ni a. Eizawnna hrang hrang awmte zingah hian hna zahawm tak a ni." a ti a. "Mizoram Mistiri Association hi Mizo hnam dam khawchhuahnan a hlu a, hnamdang mistiri ten hnathawkin min rawn luhchilh a, chutah chuan keini in kan kut thiamna hmangin tan kan lo khawh a pawimawh a, kan hnam tan thahnem kan ngaih a pawimawh hle." tiin a sawi.

LESDE minister Pu Tetea Hmar hian Mizoram Building & Other Construction Workers Welfare Board (MBOCWWB) chungchang sawi bawkin, "Welfare Board te hi kut hnathawktute ta a ni a, a hamthatna awm theite pawh tihpun a ni bawk. MBOCWWB chungchang hi mi tinin an hriat kan duh a. Kut hnathawktute zawng zawngin he hamthatna awm te hi dawng thei se kan duh a ni. MMA member-te pawh hi keimahni bakah kan hnuaia thawkte thlengin inziaklut vek ang u." tiin a sawm bawk a. Minister hian MMA member-te chu an theihna chinah tunlai khawvel thiamna mila inzir ve zel a, hman thiam ve zel tum turin a fuih bawk a ni.

Mizoram Mistiri Association-ah hian tun dinhmunah member 3000 vel an awm mek a. Mizoram chhungah Branch 115 inziaklut awm tawhin, kumin atan hian Branch 50 velin zawm thar turin hma an la bawk. MMA General Assembly vawi 11-naah hian kum 2026-2028 chhunga General Headquarters hruaitu turte thlan a ni nghal a. Chungte chu:

President - Pu Rochharliana Khiangte, Bethlehem Veng

Vice President - Pu Vanlalhriata, Zuangtui

General Secretary - Pu CD. Lalthlamuana, Bethlehem Veng

Asst. Secretary - Pu K. Hmingthanzauva, Edenthar

Treasurer - Pu C. Lalchawiliana, Bungkawn
Fin. Secretary - Pu PC Lalengzauva, Kulikawn

MMA General Assembly vawi 11-naah hian kum 2024 Assembly leh 2026 Assembly inkara member thi mi 39 te sunna hun neih a ni a. Chawhnu lamah Rorelna neih a nih bakah Variety Programme hman niin hetah hian hruaitu chawimawina neih a ni bawk a ni.