Traffic SP chuan Lirthei khalhtute tana hriattur pawimawh a hnuai a mi ang hian a chhuah :
Kum 2017 bul kan tan chho chauh emaw tih lai in Police rccord-ah chuan Road Accident avanga nunna chan chu January leh February thla chhungin mi 17 vel lai mai alo ni ta hi a lungchhiat thlakin a pawi tak zet a ni. Heng chhiatna lo thleng thin hi abul berah chuan lirthei khalhtute inthlahdah vang te, rui chunga lirthei khalh leh lirthei enkawl that tawkloh (vehicle unfit) avanga thleng a ni deuh ber a ni.
Lirthei khawl nunglo (switch oft) chunga tlan tir hi Dan phalloh a ni a, chhiatna tam tak thleng te hi lirthei a nih dan tur anga enkawl loh leh Dan palzut chunga lirthei khalh avang a ni fo a. Hetiang Dan phalloh tihluih thin avang hian chhiatna nasa zawk a thleng fo thin reng a ni. Lirthei enkawl chungchangah kan fimkhur lehzual a tul tak zet a, abikin lirthei neitu leh enkawltu (driver) te hian an lirthei an check uluk in tlanchhuak tlak ngei a nih leh nihloh enfiah hmasak hi an mawhphurhna leh an tih ngei ngei tur a ni. Nimin mai ni 12.4.2017-a Electric Veng, Aizawl a Taxi pakhat accident avanga St. Mary's School hmeichhe naupang in nunna a chan ta mai hi a pawi tak zet a, hei hi driver fimkhur tawkloh vang niin a lang.
Lirthei avanga Chhiatna tam ber thleng thin hi Dan phalloh Zu leh ruihtheih thil dang rui chunga lirthei khalh thinte vang a ni. Rui chunga lirthei khalh thin te hi Supreme Court Committee on Road Safety chuan a hremna lekkawh dan tur pawn a siam a, Zu leh ruihtheih thil dang rui chunga lirthei khalh te, midang tana hlauhawm khawpa chaka lirthei khalh te, lirthei khalh chunga mobile phone hman te, signal zawmlo man reng reng te chu an Driving License thla thum (3) tal suspend turin Transport Authority ah thawn zel turin Supreme Court Committee on Road Safety chuan thupek a lo chhuah tawh a ni.
Heng thil lo thleng thin te avang hian Traffic Police chuan Dan leh Thupek kenkawhna kawngah nasa leh zualin tan a la mek zel a, heng a chunga tarlan Dan bawhchhia man reng reng te chu Dan angin an chungah hremna khauh takin lekkawh a ni ang.
