Vawiin khan hian Aizawl Municipal Corporation (AMC) Conference Hall, Thuampui-ah AMC area hnuaia Local Council hotute pualin “One Day Consultation Meeting on Acts and Rules Relating to Motor Vehicles, Vehicles Parking and Noise Pollution” neih a ni a. Transport Department Commissioner & Secretary Pu KT.Beicho, IRAS chuan he hun hi kaihruaiin UD&PA, PWD, Traffic Police, Aizawl Municipal Corporation leh Transport Department hotuten he hun hi an hmanpui a ni.

Aizawl-a lirthei tam lutuk avanga harsatna awm hrang hrangte chungchangah hemi kaihhnawih Department hrang hrang atangin sawifiahna (presentation) neih a ni a, motor parking chungchangte, lirthei khu nasa chungchangte leh lirthei ri bengchheng lutuk chungchangte sawiho a ni a. Heng avanga mipuiin harsatna an tawh dante sawiho niin sawrkar leh Local Council te tangho a hmalak dan tur te ngaihtuah a ni a. Hemi kaihhnawih sawrkar dan leh hraite zawm chungchangah hmasawn a la ngai hle ni a hriat a ni.

Aizawl khawpui hi chenna atan hmun nuam zawka siam turin khawtlang hruaitute leh mipuiten tun aia nasa zawka hmalak a tulzia sawiho niin, kan chenna hmun, kan khawpui hi chenna hrisel leh nuam taka siam turin mipuite tangrual turin he huna kalkhawmte hian an ngen a ni.