Aizawl Municipal Council (AMC) huaihawt Aizawl Local Council Conference ni 2 awh tur chu vawiin khan Chanmari YMA Hall ah neih tan a ni a, Chief Minister Pu Lal Thanhawla’n a hmanpui.

Chief Minister chuan Local Council Member kalkhawmte hmaa thusawiin Sorkar chuan a intiamna ang taka Aizawl Municipal Council a din thu leh thuneihna leh mawhphurhna te pawh a tahtawla hlan chhawn mek zel a nih dan te a sawifiah a, AMC leh Local Council te chu khawpui hmasawn nana inpawh taka thawk tlang zel tur an ni a, inhmuhkhawmna hun buatsaih a ni chu lawmawm a tih thu a sawi. Mizoram chu Kristian ram ni si, dawt leh thudik chanve hmanga inpuhmawhna a tam thin chu pawi tiin Chief Minister chuan duhamna leh hlemhletna-in min eichhe mek a, heng kara Zoram-in kan mamawh ber chu rilru insiamthatna (moral reformation) a ni, a ti. Ei ru ni-a kan hriatte chu kohhran leh khawtlangin kan hnawl ngam a hun tawh hle a ni, a ti bawk. Sum leh paia kan pachhiatzia hre rengin State tan engtin nge sum kan thawh chhuah ve ang tih kan ngaihtuah tlan a tul a, ei leh barah pawh thla 2 ei awrh kan tharchhuak thei a, tih tak zeta ram siamtha tura tan kan lak tlan a tul a ni, a ti. Sorkar hnathawk te pawhin thla tina hlawh tam tak kan lak thin phuin ram tan enge kan pek let ve tih kan inzawh a pawimawh a ni, a ti bawk. Sum enkawlna kawngah te, faina leh thianghlimna leh khawsak phungah mipui kaihruai tur leh tihhmuhtu-a tang thin turin khawtlang hruaitu kalkhawmte chu a chah bawk. Aizawl khawpui kawngpui chepna chhan lian tak pakhat chu insa tu ten kawngpui an nek thin vang te, motor leh bungrua te kawng tihnawk zawnga kan chhawp thin vang a ni fo tiin Pu Lal Thanhawla chuan kan zavaia kan nawm tlan theih nan Dan dinglai te tha taka kan zawm tlan a tul a ni, a ti.

Local Council Conference, CEO Pu Nghaklianmawia kaihhruaiah hian Local Council kalphung leh Dan te, sum vawn dan hmang te, AMC hmalakna te, bawlhhlawh enkawl dan te leh hmasawnna hna hrang hrang thawh mek te an inhrilhfiah a, khawpui Local Council member te an kal tha hle a ni. Local Council Conference hi naktip ni 21 March, 2012 ah neih chhunzawm a ni ang.