No.3370/2019-2020

Covid -19 laka inven nana ram pum huap lock down kalpui a nih mek laiin mipui ten eitur thlai leh anhnah lam an tlakchham lohna tur leh thlai huan neitute pawn an thlai tharte chhe mai lova suma an chantir theih nan sawrkar chuan chak takin hma a la zel a. Horticulture Department enkawltu, Chief Minister Pu Zoramthanga hmalaknain Nodal Department - Horticulture Department, Commerce & Industries, MIZOFED leh Local Task Force te tangkawp chuan Mizoram sawrkarin tual chhunga thlai thartute thlai tharchhuah dehralna tur a ruahman Local Vegetable Supply Chain chu kalpui ṭan a ni.

Dr. Elizabeth Saipari, Director of Horticulture hnen atanga report dawn dan chuan Mizoram sawrkar ruahman angin Pu H. Dolianbuaia, Chairman, Serchhip District Task Force on Covid-19  leh  Pi M. Vanlalzami, DHO Serchhip, Horticulture Department  leh Pu C. Lalsiamliana, Chairman, Agri & Horti Co-op Society ten hma an la nghal a. Heng thlai te hi nizan zanlaiah khan Serchhip Bazar atangin Motor Trip 18 lai rawn phur chhuakin vawiin 28.03.2020 ah Veng engemaw zatah sem chhuah a ni a. Hei bakah hian Ar vulhtu mangangte ta Arsa 28.0 Qtls. an hralh chhuahsak bawk a ni.

Serchhip atanga thlaithar lo lut bakah hian Thingsul Tlangnuam, Tlungvel leh Aizawl chheh vel atangin Mizo thlai chi hrang hrang Behlawi leh a dangte, Thei, Balhla leh Thingfanghma lak luh a ni bawk a. Vawiin tlai thlenga COVID-19 Vegetable Supply Chain hnuaia thlaithar lak luh tawh zawng zawng hi Trip sawmhnih (20 Trips) chuang a ni.

Local Vegetable Supply Chain ah hian Horticulture Department, Commerce & Industries leh MIZOFED te an tangkawp a. Designated Collection Centres i.e, Ngaizel, Chanmari, Bara Bazar leh Vaivawkawn market-ah a thlen tura ruahman a ni. Heta tang hian LLTF ten an hun chan dan angin  an lam ang a, an vengah theuh an sem leh theih tur a ruahman a ni. Thlai lak luhte hi MIZOFED chuan a hmunah a man an lo pe nghal zel a ni.