No.1263/2020-2020

Covid-19 hrileng avangin kumin March thla chawhnu atangin lockdown kalpui a ni a, Transport Department Office hrang hrangte mipui tan dawr hleih theih an ni lo a, hetiang a nih avang hian Sawrkar laipuia Ministry of Road Transport & Highways chuan lockdown vuakvet chhung February Ni 1,2020 - June Ni 30,2020 chhunga document thi te chu ngaihhnathiam nise tiin order a chhuah a, chumi dungzui chuan document thi te pawh man lova chhuah zalen zel thin an nih thu Transport Minister Pu TJ Lalnuntluanga chuan vawiin khan a bial fangkual mekna hmun Champhaia a chenna In Kahrawt-ah a sawi. Chief Minister Pu Zoramthanga, Finance Minister nibawk hmalaknain mipuite harsatna sutkian nan a hun taka Lirthei chhiah pe lo te late fee ngaihhnathiam sak an nih tur thu a sawi bawk.

Mizoram sawrkara Transport department changtu Minister Pu TJ Lalnuntluanga chuan lockdown kalpui anih avangin lirthei khalhtute leh neitu te'n Tax/Fee pek chungchangah harsatna nasa tak an tawk tih Sorkar-in a hriatpui thu sawiin, late fee chawi lova Tax/Fee Transport Department in a lak ngawt chu dan angin a rem lo a ni, a ti a. Sum kaihhnawih thilah Finance department phalna lak hmasak zel angai a, Audit hmachhawn leh thin anih avangin Transport department hian amahin hma a la ngawt thei lova, Chief Minister leh Finance Minister ni bawk Pu Zoramthanga'n mipui harsatna hriain late fee chawi lova tax/ fee pek min remtih saka, a chungah lawmthu kan sawi tak meuh a ni, a ti bawk.

Chief Minister leh Finance Minister nibawk remtihnain lirthei kaihhnawih document hrang hrang February ni 1,2020 atanga June ni 30, 2020 chhunga thi (invalid) reng reng chu late fee tel lovin pek theih a ni ta a, lirthei neitu te'n an hman tangkai ngei a beisei thu Transport Minister chuan a sawi a. Central Sawrkara NIC Software te siam rem ngai anih angin department hotu te'n siam rem dilna an thlen chu NIC lamin bawhzuiin an rawn siam rem nghal a ni, a ti bawk.

Transport Minister chuan late fee chawi lova tax/ fee pek a hlawhtlinna tura phalna leh remtihna petu Mizoram Chief Minister leh Finance Minister nibawk Pu Zoramthanga hnenah lawmthu sawiin, a tul apiangte buaipuia chak taka hmalatu Transport Department hnuaia thawktute leh NIC a thawktute chungah lawmthu a sawi bawk a ni.