No.3617/2020-2020

Lockdown inkaihhruaina Clause I. D (1) leh Clause II (2) lirthei tlan dan tur leh zan curfew bawhchhia an awm avangin vawiin khan DM&R Department chuan District tin DC te leh SP te hnenah lehkha a thawn.

Clause I. D(1) “Zan dar 7:30 leh zing dar 4:30 inkarah pawn chhuah khap tlat a ni. Hemi atan hian District Magistrate ten Section 144 CrPC tlawhchhanin inkhuahkhirhna thupek an chhuah ang. Hei hian COVID-19 kaihhnawiha duty te, phai atanga bungraw phur motor in unload, chhiat tawh thil leh medical emergency-a LLTF/ VLTF ten District Magistrate-in thuneihna a pek dungzuia phalna an pek te a huam lovang” tih a ni a.

Clause II (2) “Lirthei intlanchhawk hian law & order duty te lirthei, COVID-19 duty atana Sawrkar hnathawkte lirthei hman, ambulance, medical/ veterinary emergency atana motor hman te, essential services (AMC hnuaia bawlhhlawh paih, bawnghnute phurh/ semna, P&E line duty, PHE tui sem, chanchinbu sem, LPG delivery, dak sem, adt.) atana motor hman te, print & electronic media mi te motor, Kohhran hminga motor register-te, mahni veng chhunga LLTF duty-te lirthei, khaw kar bus leh maxi cab service-te a huam lovang” tih a ni a.

Heng clause pahniha inziak anga khuahkhirh ve loh ‘exempted’ -in a huam mi thenkhat ten mahni mimal pawihaia chhuahvah nan remchang an la nia hriat a ni a. Exemption pek an nih chhan hi mipui nitin mamawh ‘essential service’ a khaihlak loh nan leh mipui phurrit ti zangkhai tura loh theihloa hna thawh ngaite tana tih a nih laiin he clause hi hmang khawlo an awm nia hriat a ni.

Private hospital-a thawk doctor leh staff te pawh order no. B.13021/113/2020-DMR/Pt July ni 20, 2020-a tihchhuah hmangin exempted list-ah dah an ni a. Doctor leh Staff te duty-na tur atan chauh tlanloh nia tlan phalna sawrkarin a pe tih DM&R lehkha chuan a sawi nawn leh a ni.

DM&R chuan he inkaihhruaina hi mipuiin tha taka an zawmna tur leh exempted list a tel ten dan dik taka inkaihhruaina an zawm theih nan hma la turin a hriattir a ni.