No.2491/2020-2020

Aizawl, the 26th June 2020 : Tun ni hnih chhunga RT-PCR khawl hmanga sample 2200 chuang endik zingah COVID-19 positive pahnih chauh hmuh belh niin tun dinhmunah he hripui hi khawtlanga inkaidarhna (community spread) a la awm lo ni a hriat a nih avang leh mipui te harsatna sutkian na’n total lockdown kalpui mek chu thlahdul deuh tha-a hriat a ni. Lockdown kalpui mek tihdanglamna chu vawiin khan Chief Secretary, Chairman State Executive ni bawk chuan a hnuai a mi ang hian a chhuah.

Mizoram Sawrkar Order No.B.13021/101/2020-DMR/Pt-III dated 21.06.2020 chu tidanglam hretin, mimal eizawnna leh lirthei leh mipui chetvelna chu a hnuaia tarlan ang hian thlah zalen a ni. Hei hi Aizawl Municipal area leh district headquarter huam chhungah 26.06.2020 atanga 30.06.2020 thleng hman tur a ni a, thil dang chungchanga inkaihhruaina erawh chu Order dated 21.06.2020 anga kalpui a ni ang.

1. A chunga tarlan Order dated 21.06.2020 hnuaia kaihhruaina-a Clause D.l chu hlih niin, dawr leh sumdawnna hmunte chu hawn phal a ni. Amaherawhchu, khawpui lunlai leh building khata dawr awmte erawh chu ni khat kar danah an in hawn chhawk ang a, dawr inthenawm te chu ni khatah a ruala hawn phal a ni lovang. Hemi atan hian Deputy Commissioner kaihhruaina hnuaiah Local/Village Level Task Force te’n ruahmanna an siam ang. Kawng sira in pho (hawker stall) te erawh chu Deputy Commissioner kaihhruaina hnuaia Local/Village Level Task Force te’n ruahmanna an siam anga kalpui tur a ni ang.

2. A chunga tarlan Order dated 21.06.2020 hnuaia kaihhruaina-a Clause F chu hlih niin, Aizawl Municipal area bikah chuan mipui veivahna lirthei (city bus, maxi cab, taxi) leh private motor te chu ‘odd-even’ scheme anga tlan phal a ni ang. Lirthei registration number, even number (number inkawpkim) a tawp te chu Thawhtanni, Nilaini leh Zirtawpni ah an tlan anga, odd number (number inkawpkim lo)-a tawp te chu Thawhlehni Ningani leh Inrinni ah an tlan thung ang. Sunday ah erawh eng lirthei mah tlan phal a ni lovang. Hei hian COVID-19 duty a tana Sawrkar hnathawkte lirthei hmante, medical leh veterinary, emergency duty te, hospital-a thawktute lirthei, print & electronic media mite lirthei, bawnghnute leh chanchinbu semte lirthei, kohhran hminga register lirthei, AMC hnuaia bawlhhlawh paihna motor, essential commodities phur leh LLTF/VLTF duty te lirthei a huam lovang.

3 Mahni lirthei tlan theih loh ni-ah loh theih lohna avanga chhuah ngai te chuan Superintendent of Police Traffic), Aizawl phalna an la tur a ni.

4. Order dated 21.06,2020 hnuaia inkaihhruaina-a Clause G.2 leh G.6 chu hlih a ni.