No.746/2021-2022

Dated Khawzawl, the 31th May, 2021: Nimin Pathianni chawhma dar 10:30 khan District Disaster Management Authority, Khawzawl District chu May ni 31, 2021 atanga Lockdown kalpui dan tur ngaihtuahin an chairman Pu Zothanmawia, Deputy Commissioner hovin DC Conference Hall-ah an thukhawm.

Nimina Khawzawl DDMA meeting-ah hian Mizoram chhung hmun dang atanga Khawzawl District-a lo zin/haw te chungchang ngaihtuah a ni a. Covid-19 hrileng hi Mizoramah khawtuala inkaichhawnna (Community spread/local transmission) a awm tih finfiah a nih tawh avangin phalna nei a khualkhua atanga lo zin/haw te pawh inkhung uar a, pawnchhuak tam lo turin hriattir nise ti a rel a ni. Village Level Task Force (VLTF) te chu an veng/khua atanga zin chhuak leh, hmundang atanga an veng/khuaa zin/haw te chu fimkhur taka lo chhinchhiah a vil zui tur leh, Covid-19 kaihhnawih case rinhlelhawm leh hmanhmawhthlak bikah chuan Medical Team, bialtu Zonal Officer, Police, Deputy Commissioner’s office zinga tuemaw ber hrilhhre vat thin tura hriattir nise tih a ni. Phalna nei lova zin veivakte hremna tur pawh duan nghal a ni bawk.

District Headquarters chhunga dawr leh bazar hawn chungchang ngaihtuah niin, tuna inkaihhruaina kalpui mek chu chhunzawmin Thawhlehni leh Zirtawpni-ah te zing dar 5:00 atanga tlai dar 5:00 thleng dawr leh bazar-te hi hawn nise ti a rel a ni. Heng hun loahte chuan mahni ina dawr neite pawh inhralh leh dawr phal an ni dawn lo a ni. Khawzawl DDMA thutkhawmah hian District Headquarters chhunga hmasawnna hnathawh chungchang leh Sawrkar Office kalpui dan turte pawh ngaihtuah a ni.

Khawzawl District chhungah Covid-19 dinhmun thlirhona neih niin, Covid-19 positive enkawl lai 12 (sawmpahnih) awm mekin, primary contact khunghran mek chhungkaw 100 chuang an awm mek thu ngaihthlak a ni a. Covid-19 vei damlote hi Covid Care Centre pahnihah dah an ni. Covid Care Centre atanga chhuak tawh zat hi mi 59 niin, nimin thlenga Khawzawl District-a Covid-19 Total Case zat chu 71 (sawmsarih leh pakhat) a ni. An ni bakah hian phai atanga lo haw khunghran lai mi 16 an awm mek bawk.

Khawzawlah hian April 21 atanga vawiin thlengin Covid-19 Lockdown kengkawhin Covid-19 Executive Team leh VLTF te ngawrh takin an duty zel a. Nimin thleng khan Covid-19 kaihhnawih dan bawhchhia mi 222 man tawh niin, an pawisa chawi tlingkhawm hi Rs. 52,500 (Cheng singnga, sanghnih leh zanga) a ni tawh tih meeting-ah hian tarlan a ni bawk.