2632/2025-2026

Aizawl, the 12th December, 2025: Ek Bharat Shreshtha Bharat hmalakna hnuaiah Mizoram Larsap, General (Dr) Vijay Kumar Singh, PVSM, AVSM, YSM (Retd) hovin nimin khan Assam leh Nagaland State-te dinchamphaphak 'Foundation Day' lawmna chu Durbar Hall, Lok Bhavan, Aizawlah neih a ni.

Larsap General (Dr) Vijay Kumar Singh chuan Assam leh Nagaland-te foundation day puala duhsakna hlanin, state pahnihte chu Mizoram ang bawka hnam ziarang leh danglamna ngah tak an nih thu a sawi a. Assam chu India hmarchhak tana luhka pawimawh tak, history mai bakah geography ang pawha hmun pawimawh tak chang a nih thu a sawi a. Nagaland chu hnam peng hrang hrang awmna leh kutthemthiamna avanga hriat hlawh a ni, a ti a. Hornbill Festival chu khualzin hiptu lian tak a nih thu sawiin, Mizoram pawhin an kalphungte bihchianga a kalpui ve theih ngei a beisei thu a sawi bawk.

Mizoram Larsap chuan Sawrkar laipui hmalakna Ek Bharat Shreshtha Bharat programme chu India ram hnam ziarang leh nunphung hausa tak pholanna leh inhriatpawh tawnna tura buatsaih thin a nih thu a sawi a. India ram intodelh 'Vikshit Bharat' ni turin mawhphurhna, abik takin ram inghahna thalaite'n an neih nasat thu sawiin, Vikshit Bharat ni turin midangte hnam ziarang leh nunphung zir peihna, tanruala, inunauna tha leh inhriatpawhtawnna neih a tul thu a sawi a. Internet lamah thu dik tawk lo leh chi inthliarna lam hawi thu thehdarh a tam tih sawiin, kan zavaia him nan leh inpumkhat nan Ek Bharat Shreshtha Bharat programme hi duan a ni, a ti a. Thalaite chu an kalna apiangah an hnam ziarang leh nunphungte midang hriat leh hmuh theiha pholang tam turin a chah nghal bawk.

He hun hi Pi Lalhruaitluangi, APS to Governor chuan kaihruaiin programme buatsaih chhan a sawifiah hnuah Assam Larsap Pu Lakshman Prasad Acharya thuchah rawn thawn ngaihthlak a ni a. Assam state aiawhin Assam Cultural Society President Prof. P.C. Kalita, College of Veterinary Sciences & Animal Husbandry (CVSc&AH), Selesih leh Nagaland state aiawhin Dr. Bendangchuchang Longchar, Asst. Professor, Pachhunga University College (PUC) te'n an state chanchin tawi an sawi a. Assam leh Nagaland-te chanchin pholanna video hmuhnawm tak thlir ho a ni a, Assamese, Naga leh Mizo zirlaite'n hnam lam leh zaite an entir bawk.

Hemi hnu hian Larsap General (Dr) Vijay Kumar Singh leh First Lady Pi Bharti Singh te'n hemi puala kalkhawmte hi Upper Lawn, Lok Bhavan-ah kawmin hun hlimawm tak an hmang ho a ni.

Ek Bharat Shreshtha Bharat programme hian India rama State leh UT hnuaia cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh inhriatthiamtawnna nasa zawk siam a tum a. He programme kaltlang hian India rama State leh UT hrang hrangte dinchamphaphak Foundation Day lawmna chu Lok Bhavan, Mizoramah Governor kaihhruaiin June, 2023 atang khan buatsaih tan a ni.