Lok Sabha inthlanpui 2014 ah Mizoram aiawha seat awmchhun luah turin Indian National Congress candidate Pu C.L.Ruala chu vote 2,10,485 hmu-in thlan tlin a ni. Amah hnaih ber tu Independent candidate Pu Robert Romawia Royte chu vote 6154 in a hneh a ni.

United Democratic Front in an thlawp, Independent candidate Pu Robert Romawia Royte hian vote 2,04,331 a hmu a. Aam Aadmi Party Candidate Pu M.Lalmanzuala chuan vote 11,890 a hmu thung. None of the Above (NOTA) ah vote 6,495 a tla bawk a ni.

Pu C.L.Ruala hi December 25, 1935 khan Pu Thanzinga leh Pi Thangpuii te inkarah Lawngtlai District-a Chawnhu khuaah a lo piang a. Kum 1966 khan Lalhmingthangi nen inneiin fapa 5 an nei. Politics khawvelah sulhnu tam tak neiin nihna hrang hrang engemawzat a chelh tawh a. Mizo District Council ah kum 1970 khan member-ah ruat (nominate) a ni a; kum 1978 leh 1979 inthlanah te khan Mizoram (UT) Legislative Assembly ah thlan tlin a ni a; kum 1984 atanga 1987 chhung khan a term thumna atan Mizoram (UT) Legislative Assembly-ah thlan tlin niin Cabinet Minister a ni a; Agriculture, Soil Conservation, Forest, District Council Affairs leh Law & Judicial Department-te a chang a ni. Kum 1989 atanga 1993 chhung khan Mizoram State Legislative Assembly-a Cabinet Minister ni zui lehin Agriculture, Forest, Home, PHE, Excise leh Taxation Department- te a chelh a. Kum 1993 atanga 1998 thleng khan Cabinet Minister niin Power & Electricity, Food & Civil Supplies, Industries leh District Council Affairs Department te a chang a ni. Kum 2009 Lok Sabha inthlanpuiah khan Indian National Congress candidate niin thlan tlin a ni a. Lok Sabha committee peng pawimawh hrang hrang - Standing Committee on Petroluem and Natural Gas; Railway Convention Committee; Consultative Committee, Ministry of Tribal Affairs; Committees on Welfare of Scheduled Castes and Scheduled Tribes; Standing Committee on Energy leh Library Committee ah te member a lo ni tawh a ni.

Returning Officer Pi Juhi Mukherjee, IAS, chuan inthlanna tluang tak leh felfai taka neih a nih theih nana theihtawp chhuaha thawktu zawng zawng te leh Mizoram mipuite chungah lawmthu a sawi a ni.