4231/2023-2024

Kolasib dated 18th March 2024: Vawiin khan DC Conference Hall, Kolasibah Lok Sabha MP Lok Sabha kalpuina tur a mawhphurhna pawimawh zual bik nei Department-te leh Election kaihhnawih a Nodal Officer ruatte chuan thutkhawmna an nei a. Pu John LT Sanga, Deputy Commissioner chuan thutkhawmna hi kaihruaiin hmalak tawhna leh hmachhawp hrang hrang sawi hona hun neih a ni.

Pu John LT Sanga, Deputy Commissioner chuan MP Lok Sabha Election kaltlang a mipui aiawh thlan chhuahna tur a chanpual hrang hrang neite chuan inthlanna thianghlim, felfai leh langtlang siamna kawng ah mawhphurhna pawimawh tak an neih thu sawiin kan vote hmang a kan duhthlanna chanvo hmang theuh tur a mipui zirtir a pawimawh thu a sawi a. Zalen leh ralmuang tak a mipuiin vote an thlak theih nan Sawrkar a mawhphurtute, khawtlang leh tlawmngai pawl tanrualna a pawimawh thu a sawi.

Vawiin thutkhawmna ah hian mipuiin vote an thlak theihna tur a Polling Station panna kawng te, tui leh kawlphetha thlunzawm te, inthiarna hmun felfai buatsaih kawng a harsatna awm thei te leh hmalak dan tur sawi ho a ni a. Inthlanna kalpui chhung a mawhphurhna hrang hrang neite Training pek dan tur te, EVM leh VVPAT hman tur endik hna kalpui dan te, Media Centre leh Control room ruahman dan te sawi ho niin mipuiin vote thlak an ngaih pawimawh theihna tur a SVEEP kaltlang a inzirtirna kalpui dan tur te sawi a ni bawk.