2690/2024-2025

25th October, 2024 : Mizoram Lok Sabha MP Pu Richard Vanlalhmangaiha chuan Oct ni 21 - 24 chhung khan Mumbai a tlawh a. A cham chhung hian Mizoram House hmun thar tur Navi Mumbai ami a tlawh.

Navi Mumbai-a hmun hi Mizoram House sakna tura ruahman tawh a ni a, a satu tur thlanfel vek hnuah pawh chhan hrang hrang vangin kum tam tak sak theihlohin a awm a, sa tura Mizoram sorkain inremna a lo neihpui tawh (real estate builders) US Roofs Ltd. hotute a hmu a, harsatna an neih te a sawipui a. Tin, helai ram petu City and Industrial Development Corporation of Maharashtra Limited (CIDCO) Vice-Chairman leh Managing Director nihna chelh kawp Vijay Singhal pawh a Office-ah lengin a hmu nghal bawk a, Mizoram sorkarin harsatna an lo tawh dan te a thlen bawk.

MP hi Maharashtra CM chenna inah kalin, Mizoram CM in lehkha ziaka Maharashtra CM hnena a thawn, he hmun chungchanga Mizoram sorkarin harsatna a lo tawh ṭhin te a theih anga ṭanpui tura a dilna chu a pe nghal bawk a ni.

Pu Richard-a hian Mumbai Mizoram House, Parel Venga awm chu tlawh bawkin, damlo awm mek te kanna pawisa a pe a. Pu C. Lalrosanga, Ex-MP, damlohna avanga inenkawl mek pawh a tlawh nghal bawk.