No.3652/2020-2021  

Lok Sabha MP Pu C. Lalrosanga chuan, Model Village tura a thlan khaw panga zing ami Muthi khua chu vawiin khan a tlawh a. Muthi khua VC leh tlawmngaipawl aiawhte nen inkawmhona tawite neiin, Muthi khuaa Sawrkarlaipui leh State Sawrkar scheme hrang hrang hmanga hmasawnna hnathawh dan turte an sawiho a, Muthi khua leh a chhehvelte an fang nghal bawk a ni.

MP Pu C.Lalrosanga chuan, hripui leng mek avanga, kumhnih chhung atan MP Fund hren a nih tak avangin, MP Fund atanga hnathawh tur ruahman a harsat rih thu a sawia, chutih rual erawh chuan Central sawrkar Scheme hrang hrang leh State Sawrkar hnuaia Scheme-te tangkai taka hmang thei tura ruahmanna mumal tak siam a pawimawh thu leh Chief Minister bial an nih avanga an vanneihnate chhawr thiam a pawimawh thu a sawia, CM kaihhruaina hnuaiah, Muthi khua chuan hmasawnna tha tak a neih ngei a beisei thu a sawi bawk a ni. 

He inkawmhona-ah hian KVK hotu Dr. Chaudhury pawhin thu sawiin, Muthi khua chu, Agriculture, Ran vulh leh Horticulture lam tihmasawn tura enkawl bik atan an thlan leh an enkawllai a nih thu a sawia. Muthi khua mithahnem tak Dragon Fruit ching tur leh Ar vulh tura an thlan tawh thu leh chak taka hma an lak mek thu a sawi a, MP hova hmalakna chak zawk leh tha zawk an neih theih ngei a beisei thu a sawi a ni.

He inkawmhona hunah hian, khawtlang aiawh kalkhawmten an khua leh a chhehvel hmasawnna tura rawtna an neihte an sawi bawk a, Mizoram MP Pu C. Lalrosanga chungah lawm thu an sawi  a ni.