No.6573/2020-2021
Nimin ni 16.11.2020 khan Lok Sabha MP Pu C.Lalrosanga chu Aizawla BSNL General Manager thar Pu Arun Kumar chuan a chenna inah a tlawh a, Mizoram-a BSNL Landline leh internet connection tih that tum mek a nih dante a hrilh bakah, tun thla ni 23 a Telecom Advisory Committee(TAC) Meeting Lok Sabha MP hova neih tur chungchangte a sawipui bawk.
MP hian kar hmasa khan Aizawl a NHIDCL office tlawhin, Mizoram chhunga kawngpui an sial mek chungchang te an hotute a sawipui a. Mipuiin an hlawkpui theih tur ang bera kawng siam turin MP chuan a hrih a ni. NHIDCL hotute hian Mizoram kawngpui zauh hna an thawh mek te leh an hmabak thawh tura ruahman kawng hrang hrangte MP chu hrilhin, kawngpui dang laihzauh hna thawh atana a duh lai te pawh a duh chuan rawtna an hnena thlen turin MP chu an rawn bawk a ni.
Pu C.Lalrosanga, MP hian vawiin khan Aizawla Customs Office tlawhin, ram dang atanga bungrua lakluhna kawnga Customs duty lak chungchang te Custom Assistant Commissioner Pi Neetisha Verma a sawipui bawk a. Mizorama sumdawngte tana awlsam zawka Myanmar atanga bungrua leh mamawh chakkhai lakluh theih dan tur te a sawipui. Pu C.Lalrosanga chuan Myanmar atanga thil lakluh thenkhat Kuhva angah te customs duty tihhniam anih theih nana kawng dap tul a tih thu a sawipui bakah, bungraw lo lutte check na kawngah sumdawngte tana harsatna siam lo thei ang berin customs miten an hna thawk thin se a duh thu customs hotute chu a hrilh a ni.
Pu C. Lalrosanga hian Dampa Rengpui a SAGY hnuaia MP Model Village hawng turin naktuk hian bialtu MLA Pu H Lalzirlianate nen Aizawl an chhuahsan dawn a. Ni 19 hian Mamit ah DISHA meeting Lok Sabha MP ho hian neih a ni nghal bawk ang.
