No.5564/2020-2021

Lok Sabha MP Pu C. Lalrosanga chuan nimin (28.9.2020) khan New Delhi ah Information and Broadcasting Minister Pu Prakash Javadekar hmu in Mizorama Doordarshan leh All India Radio in harsatna an tawhte leh mamawhte a sawipui.

Lok Sabha MP chuan DDK Aizawla programme leh news lam enkawltu tur hotu bik an awm loh thu I&B Minister hi hrilhin, senior officer leh Indian Information Service mi leh sa dah turin a ngen a, Minister chuan I&B Secretary phone nghalin DDK Aizawl enkawltu tur senior officer dah turin a hrilh nghal a ni.

Pu C Lalrosanga hian Prasar Bharati Chief Executive Officer Pu Sashi Shekhar Vempati leh Member (Finance) Pu Rajeev Singh-a te kawm bawkin, DDK Aizawl programme chhun dar 12 atanga chhuah thin chu programme pangngaia siam tluantling turin a ngen a. AIR leh Doordarshan hnathawkten tun thlenga HRA arrear an la hmuh loh pawh pe rang turin a nawr nghal bawk.

Lok Sabha MP hian Doordarshan Director-General hna a chelh laia a lo enkawl tawh Doordarshan Directorate a tlawh nghal a. DG Doordarshan tanglai leh DG News ni bawk, Pu Mayank Kumar Agrawal- a kawmin DDK Aizawl inrelbawlna leh sum mamawhte ngaipawimawh turin a ngen nghal a ni.

Pu C. Lalrosanga chuan AIR leh Doordarshan Engineer -in- Chief Pu CBS Maurya nena an inkawmnaah Mizorama an hnathawkte bakah an khawl leh hmanruate tiphuisui turin a ngen nghal bawk a ni.