India Independence Day a nih angin vawiin chawhma dar 10:30 khan HBSC Ground Hnahthial-ah Lt. Col. ZS. Zuala, Parliamentary Secretary i/c Home, RD, Agriculture etc. hovin hman a ni. Khuallian hian hnam puanzar pawtpharh in School parade congtingents 12 te hnam puanzar chibai buk a chhang let bawk a ni.

Khuallian Lt. Col. ZS. Zuala chuan Comptroller and Auditor General (CAG) report-ah baseline survey compact area buatsaih chungchang, NLUP Apex Board in beneficiary a thlan chungchangah te a sawi a. Zoram in NLUP hi a vei a, an ngaihven hi a lawmawm. Mizoram politics hi NLUP ah hian a vir kual ta vek mai emaw tih tur a ni. Kut hnathawktute mipuiin an ngai pawimawh tih a chiang ta hle in a lang a ti a, NLUP hlawhtlinna hrang hrang sawiin Hmunphiah-ah kum 2016 chhungin cheng nuai 5704 lakluh a ni a, Sericulture lamah pawh 2016-17-ah cocoon matric ton 375.20 thar a ni a, 2011-12 aiin a let 5 laiin a pung a, AH & Vety te, Horticulture, Agriculture te, Auto Rickshaw leh Two Wheeler bakah Industry lama hmasawnna te a sawi.

Parliamentary Secretary chuan NEDP chungchang pawh sawiin kum 2017-18 chhungin cheng vbch. 750 dah a nih thu te, PWD, P&E, PHED, Education, Health & Family Welfare, Rural Development, Sports & Youth Services a, ram pum hmasawnna te a sawi nghal bawk.

Hnahthial bial hmasawnna chungchang pawh sawiin Lt. Col. ZS. Zuala chuan IAY leh PMAY hnuaiah in 48 sak a nih tawh thu leh 185 sakna tur ruahman a nih thu te, IWMP/PMKSY (WD) project 2 thawh mek niin hacter 400-ah terrace laih zawh a ni tawh a, sangha dil 20 siam a ni tawh bawk. BADP hnuaia building sak te, playground siam leh kawng laih a nih dan te, Darzo kai Tuipui lei dawh te, Hnahthial to Haulawng kawng laih mek te, Thingsai-a border trade siam tum a nih thu te, Hnahthial-a football ground Astro Turf phahna tur te, ITC zirna certificate course chauh ni thin diploma course zir theih tura upgrade a nih tur thu leh Lalnu Ropuiliani lalna Denlung tlanga Pasaltha Mual siam tura hmalak mek-ah cheng vbch. 14 zet dil a nih thu pawh a sawi bawk.

Khuallian hian parade contingents te hnenah lawmman sem nghal in Independence Celebration Committee in lawmman a siam sak bakah Rs. 1000 theuh a belh a, Special Item neitu mi 2 hnenah Rs. 2000 ve ve a hlan in Sub District Hospital Poor Fund Committee aiawh te hnenah ama pualin Rs. 2000 a hlan ve bawk a ni. 

He hunah hian Hnahthial Town VC Association chuan Hnahthial-a Office dawr nuam bera Mizoram Rural Bank, Clean Hnahthial Committee in Hnahthial khawpui chhunga Zirna In fai, Veng Fai leh Office fai kum tluana inelna a buatsaihah lawmman sem a ni a. Hnahthial Officers' Club (HOC) pawhin Hnahthial ti hmingtha tute an chawimawi bawk a ni.