Luangmuala 132kv substation a 10MW pe chhuak thei 12.5MVA Transformer chhe ta thlakna tura transformer thar bun mek chu zawhfel thawkhat ni tawhin naktuk chhun dar 11 leh 12 inkar atang hi chuan kawlphetha pek chhuah theih beisei a ni. He thu hi Power & Electricity Department Engineer-in-Chief Pu C.L.Thangliana’n vawiina sorkar official leh thutharlakhawmtu ten a hmun an tlawhnaah a sawi a ni.

Aizawl khaw thlang leh chhim bakah Aibawk phei, Mamit, West Phaileng leh a chhehvel chawmtu he transformer hi kum 16 bawr vel zen zawn hman a ni tawh a. Kumin May leh June thla chho a ruah leh tek nasa tak tla khan khawl hi a deng chhia a. He khawl hi eng pekchhuah nan mai piahlamah Aizawl tui pekna khawl tihnun nan hman a ni a, mamawhna a nasat em avangin theihtawp chhuaha a thawm that hna an thawh hnuin hun engemawchen chu hman luih hram hram a ni a, July ni 16 atang kha chuan hman theih a ni ta lo a ni.

He transformer chhe thlakna tur hian Aizawl Water Supply Scheme tih lenna tur atana ruahman transformer chu hman a ni a, 36 Metric tons (36000kg) zeta rit a nih avangin he transformer hnuh sawn hi a hautak hle a ni. Aizawl Water Supply Scheme a hman tur erawh hi chu khawl dang ngaihtuah leh a nih tur thu Engineer-in-Chief hian a sawi. Transformer thar bun tur hian phai lam atangin Company Engineer te an rawn thawk chhuak a. Chhun zan zawma rim taka siam that hna an thawh hnuah vawiin khan he transformer thar hi bun fel a ni. Zanin dar 9 atang hian charge tan a ni anga, darkar 12 chhung charge a ni ang. Hetih chhung hian diklo leh felhlel awm thei zawng zawng enchhin niin a thalo lai a awm leh awm loh mithiam ten uluk takin an enfiah ang a. Thalo leh fello pakhat mah a awm loh chuan naktuk chawhma dar 11 leh 12 inkar hian mipui hman theih turin kawlphetha pek chhuah tan tum a ni, Engineer-in-Chief chuan a ti.