North Eastern Development Finance Corporation (NEDFi) chuan vawiin khan YMA Conference Hall, Venglai, Lunglei-ah ‘Business Meet’ a buatsaih a, he hun hmanpui turin NEDFi hmunpui Guwahati atangin Pu Bijan Saha leh Pu Sujoy Paul te pawh an rawn tel a ni.

Sumdawng mi (entrepreneurs) engemawzat telna he ‘Business Meet’-ah hian Pu Lalhruaizela Fanai, NEDFi Lunglei Branch Manager chuan an hmalakna hrang hrangte tarlangin, an scheme neite a sawifiah a. NEDFi chuan Loan nuai 100 aia tam lovah chuan a pung (interest rate) pawh kum khatah zaa 8%-a an tih hniam thu a sawi bawk a ni. NEDFi hotute leh kalkhawm ten zawhna leh chhanna hun hmangin hun hi khar a ni.

NEDFi hi kum 1995-a Sorkar laipuiin hmarchhak bial hmasawn nana a din a ni a, tunah hian DONER Ministry hnuaiah awmin Industry leh sumdawnna lampangah loan an puk tir thin a ni. Mizoramah hian Aizawl leh Lunglei-ah Branch Office an nei a. Lunglei NEDFi Office hi 26th April, 2013-ah hawn tan a ni a, chuta tang chuan mi 44 hnenah loan pek tawh a ni. Lunglei Branch atanga loan pekchhuah tawh belhkhawm chu cheng nuai 185.40 a ni.

NEDFi hian December ni 3 & 4, 2013-ah Champhai leh Aizawl-ah ‘Business Meet’ buatsaih chhunzawm an tum bawk a ni.