No.554/2021-2022

Lunglei the 17^th, May’ 2021: Vawiin chawhnu khan Pu Kulothungan A, Deputy Commissioner Lunglei District kaihhruainain DC’s Conference Hall, Lunglei ah Community Covid Care Centre (CCCC/4C) – sawrkar phalna hnuaia sawrkar puihna tel mang lova khawtlangin Covid-19 veite enkawlna hmun a din leh kalpui chu Lunglei District-a ruahman dan tur chungchang meeting neih a ni. Meeting ah hian Addl. DC, CMO, Medical Superintendent, Police, Official, BCM, PCI hruaitute bakah Sub-Hqrs YMA, MHIP, Chanmari leh Rahsiveng VLTF te an tel a ni.

Chairman Pu Kulothungan A chuan Covid -19 hrileng chuan Lunglei District pawh tuam zelin hri kai pawh kan lo pung zel a, Covid-19 hri kaite enkawlna turin Covid Care Centre (CCC) te hmun hrang hrangah siam a ni a, hri kai kan lo pun zel avangin Kohhran hrang hrang , YMA leh VC te nena tangruala 4C siam a ngaih thu a sawi ani. Lunglei District chhungah khum 200 awm theihna 4C (positive enkawlna) siam thei tura hmalak a ngaih thu meeting ah  sawi  a ni a,  meeting chuan tualchhung kohhran hmunhma nei tha te hnenah Lunglei District Level Task Force hmingin 4C siamna tur ngenna siam nise, a copy hi kohhran Head Quarter theuh bakah YMA leh VC te hnenah pek nise tih rel a ni. Lunglei khawpui chhungah khum 150 tal enkawl theihna awmse, a bak khum 50 dang chu Tlabung, Bunghmun leh Lungsen ah te awm thei se tih rel a ni.  4C hi sawrkar phalna hnuaia sawrkar puina tel lova  khawtlangin Covid-19 veite enkawlna hmun din leh kalpui a ni a.  Chuvangin khawtlang tangrual, NGO, kohhran ten ruahman theih chuan 4C hi a siam theih a ni. Lunglei District chhunga veng tin ten Covid-19 positive mahni veng chhung mi leh sa enkawlna hmun siam a enkawl theih tura inpuahchah thei se meeting chuan a duh a ni.

Lunglei khawpui chhungah Community Quarantine Centre (CQC) atan BCM tualchhung kohhran 7 Chanmari, Venglai, Rahsi Veng, Venghlun, College Veng, Zohnuai ‘E’ leh Salem Veng ten kohhran  Hall hman an phalsak a. Heng Kohhran Hall te hi 4C atan dil leh nise tih rel a ni. BCM hnuaia R&D Guest House khum 10 awmna chu paid 4C enkawlna atan dil tura rel a ni bawk.