Vawiin nileng khan Zohnuai Mual, Lungleiah Art and Culture Department leh Mizo Cultural Organisation Sub.Headquarters Lunglei te chuan Cutural Meet an buatsaih a. Lunglei Deputy Commissioner Pi K.Lalrinzuali chu khuallian niin he hun hi a hmanpui a ni.

Khuallian chuan Cultural Meet buatsaihtute fakin kan hnam nunphung leh khawsak phung te, kan hnam inchei dan leh tihdan thate a ral mai loh nan leh thangtharte pawhin an lo hriat ve zel theih nan heng hun hi buatsaih a ni, a ti. Kan pi leh pute rohlu - zonunmawi, awm dan tha, tlawmngaihna, aia upa zahthiam, mi retheite khawngaihna te vawng nunga, kan hriat thar leh ka duh, Pi K.Lalrinzuali chuan a ti a. Mizo hnam incheia inchei a pawimawh em em rualin kan rilru leh kan chetziaah nunmawi lanchhuah tir hi Mizo hnam humhimna pawimawh tak a ni, a ti.

Cultural meet hawnna inkhawm hi Pu R.Lalsangvunga, President, MCO, Lunglei chuan a kaihruai a. Art and Culture Senior Research Officer leh he Cultural Meet Organising Committee Chairman ni bawk Pu Gen Khan Do chuan lawmthu sawiin hawnna programme hi tih tawp a ni. Vawiin nilengin Meet hi neih niin hnam lam chi hrang hrang - cheraw, sarlamkai, chheih lam, parlam chawnglaizawn te entir a ni a. Mizo rimawi - tumphit, tingtangnawh, phenglawngtum leh hnahtum te ngaihthlak a nih bakah Mizo infiamna hrang hrang entir a ni a, zaithiam tak tak te he hunah hian an zai bawk a ni.