2204/2022-2023
Lunglei the 6th October' 2022: Vawiin khan SP Office Conference Hall, Lunglei ah Computer leh Internet hman chungchang a inzirtirna ni Cyber Jagrookta Diwas chu hman a ni. Pu Rex Zarzoliana Vanchhawng, Superintendent of Police, Lunglei chuan khuallian niin a hmanpui. He hunah hian Police, 2Bn MAP, Fire Service, MPRO, NIC leh I&PR department te an tel a ni.

Cyber Jagrookta Diwas hmanna inkhawm hi Pu Albert Lalnunpuia, SDPO, Lunglei chuan kaihruaiin Khuallian Pu Rex Zarzoliana Vanchhawng chuan Computer leh Internet hman chungchang a inzirtirna ni a lokal te chungah lawmthu a sawi a. Social media hman chungchangah kan fimkhur tawk loh avangin inbumna a tam a Cyber hmanga bumna tawktu te hi a tlangpuiin mi lehkhathiam chin te an ni thin a, chuvangin sorkar hnathawk leh lehkhathiam te hnenah cyber chungchang inhrilhhriat a ngaih thu a sawi a ni. Hmanlai chuan mi bum dawn in pawisa an dil thin a, an pek loh chuan bum ngaihna a awm lova, tunlai khawvel thiamna thangzelah computer leh phone hmanga pawisa laksak a tam thu a sawi a. Hemi laka kan lo invennan leh buma kan awmloh nan cyber crime hi kan hriat a ngai a ni a ti. Office hrang hranga computer khawihtute kan nih avangin kan in update a miten harsatna an tawh lohnan inhrilhhriat a ngaih thu a sawi. Police te hi hnu chhuitu kan nih angin cyber crime a awmin police ah an thlen thin a, thil zawng zawng chhuichhuak thei lo mah ila a chinchang hriat erawh a ngaih thu a sawi a. Kan bank account leh ATM te midang hman tir loh bakah bank kimchang midang te hrilhhriat loh a that thu a sawi bawk. Computer leh Internet hmandan chungchanga kan thiamna te midangte hnenah a zau thei ang bera hrilhre turin a chah a ni.

Pi Ramnunmawii, Inspector, SP office Lunglei in Cyber Crime hmansual leh fimkhur ngaih dan sawiin Mizoramah pawisa chungchanga inbumna a tam a, hemi laka kan invennan bank account, OTP, bank chungchang a thil pawimawh te midang hrilh loh te, online a thil chah fimkhur a ngaih dan te, hursualna chungchanga thil post te, loan dilsak te, mahni hming lova simcard hman te leh finfiahna nei lova thil post hmasak nih te hi a pawi thu a sawi a ni.

Cyber crime a harsatna nei ten Cyber Crime Police Station, Police Hqrs, Khatla Aizawl Phone No. 0389 2333656 ah emaw mahni awmna atanga Police Station hnaiberah hriattir tur a ni.