Vawiin chawhnu khan Lunglei DC Conference Hall-ah SDO(S) Pu H. Lalrinpuia kaihhruaina hnuaiah Lunglei District huam chhunga CM Rural Housing Scheme beneficiary-te thlangchhuak tura din District Level Selection Committee member-te a vawikhatna atan an thukhawm.

Pu H. Lalrinpuia chuan Chief Minister’s Rural Housing Scheme chu Mizoram sawrkar flagship program New Economic Development Policy (NEDP) hnuaia mi harsa te dinhmun chawikang tura hmalakna pawimawh tak a nih thu a tarlang a. He scheme in a tum ber chu thingtlang khuaa cheng, in neilo te tana in thar sak sak leh kutcha ina khawsa te in thuamthat a ni tiin a phu ngei ten tanpuina an dawn theih nan Gram Sabha kaltlangin dik taka beneficiary thlanchhuah an nih tur thu a tarlang a. Chief Minister’s Rural Housing Scheme ina a thiltum “Shelterless & Kutcha House Free State” kan neih theih nan Lunglei District chu “Shelterless and Kutcha House Free District” ni turin tan i la tlang ang u tiin kalkhawmte chu thawhho puiah a sawm a ni.

Pu K. Lalrohlua, PD DRDA Lunglei pawhin thu sawiin Chief Minister’s Rural Housing Scheme chu thingtlanga chengte hmasawnna leh hamthatna tura sawrkarin a duan a ni tiin dik taka beneficiary thlanchhuah an nih theih nan Block tinah BDO kaihhruaina hnuaiah Block Rural Housing Committee (BRHC) din a nih thu a tarlang a. Beneficiary thlanchhuah chu dik leh felfai taka kalpui tum a ni tiin he Scheme hnuaiah hian Lunglei District huam chhungah beneficiary chhungkaw 619 thlanchhuah an nih tur thu a tarlang bawk.

Vawiin Committee–ah hian Lunglei West Assembly Constituency bialtu MLA Pu Chalrosanga Ralte, Lunglei District huamchhunga BDO pali te, SDO (C) Hnahthial leh SDO (C) Tlabung, DLAO, DUDO leh tlawmngai pawl aiawhte an tel. Committee hian March ni 6, 2018 hian Lunglei DC kaihhruaina hnuaiah Convention Center, Lunglei-ah Chief Minister’s Rural Housing Scheme hawnna programme neih ni se tih a rel bawk. He Scheme hi thingtlang khua a chengte tana duan a nih angin Lunglei District chhunga Lunglei Town, Hnahthial Town leh Tlabung Town area a chhungkaw chengte a huam tel lo ang.

Chief Minister’s Rural Housing Scheme hi NEDP hnuaia hmalakna niin tun dinhmunah he scheme kaltlang hian Mizorama District panga Champhai, Lunglei, Kolasib, Mamit leh Aizawl ah te in sang hnih (2000) sak tum niin beneficiary tin ten in sak nan Rs. 50,000/- theuh an dawng dawn a ni.