Lunglei District Registration & Stamp Office thar chu vawiin khan Principal Secretary, Revenue Department Pu R.L.Rinawma, IRS-in a hawng.

Settlement Officer Pu K.Laltlawmlova kaihhruai hawnna inkhawmah hian Pu R.L.Rinawma chuan mihring khawsak pangngai hmasawnna lam pana kal mek karah chuan indawrna, sumdawnna, thil neih inthleng kual, inrinchhawnna tam tak a awm a; chung zawng zawngte chu mumal taka Dan chhunga kaltlang tir rualin thil vawn that nan te, a dik leh felfaizia te tihchian nan Registration & Stamp hi thawktu a ni, a ti a. State dangten kum tam tak an lo hman tawh hnuah Mizoram-ah bul kan tan ve thei ta chu a lawmawm hle a. Mizoram nena inmil tawk tura chhutin Aizawl-ah Registration & Stamp hmunpui a awm bakah Sub-Registrar 3 a awm ang a, District Headquarters tinah Sub-Register 1 theuh nei tura ruahman a ni tih a sawi bawk. Registration & Stamp office tina hnathawktu tur 40% atan mimal rawih (private outsource) tum a nih thu sawiin Pu Rinawma chuan hei hian eizawnna tam tak a siam chhuak ang a, sorkar pawh nasa fein a chhawk dawn a ni, a ti.

The Registration Act, 1908 leh The Stamp Act, 1899 (The Indian Stamp Act lo ni zui ta) te hi Dan hlui, British ho duan a ni a. He Dan hi tawifel tak leh belhchian dawl tak a nih avangin India rama state zawng zawngin an thlauh thlak phal miah lo a ni. State 20 chuangin an hman he Dan kenkawh awlsam theih zawk nan tunlai IT khawvel thiamna hmangin a hranpain software an siam chhuak a, entir nan hengte hi tarlang ila :

Karnataka – KAVERI (Karnataka Valuation & E-Registration)

Mahrashtra – SARITA (Stamp Registration with Information Technology Application)

Tamil Nadu – STAR (Simplified Transparent Administration of Registration)

West Bengal – CORD (Computerisation of Registration of Documents)

Andhra Pradesh – CARD (Computer Aided Administration of Registration Department).

Vawiina Registration & Stamp Office thar hawnnaah SDO(Sadar), Lunglei Pu K.Vanlalthiana’n Presentation hmangin he Dan chungchang leh a kaihhnawih a sawifiah a. Revenue Department Jt. Director Pu Vanlalngena’n lawmthu sawiin inkhawm hi a khar a ni.

Attachment

  • Loading attachment...