Pi M.Zohmingthangi, Lunglei Bawrhsap leh District Election Officer kaihhruaina in vawiin chawhnu dar 2:00 khan Circuit Conference Hall, Lunglei ah Election chungchang meeting pawimawh tak neih a ni. He meeting ah hian Head of Office hrang hrangte bakah, Lunglei District chhunga SDO (Civil) leh BDO te an kal kim hle.

A hmasa berin kawng chungchang sawihona neih a ni a, SDO leh BDO te chuan anmahni huam chhung theuha kawngte chu tun dinhmunah a la tha tawk a report a ni. Pahnihna ah Electrication of  Polling Station sawiho a ni a, hei pawh hi inthlan hmasa ang bawkin hmalak a nih thu P & E Deptt. lam atanga ngaihthlak a ni. Polling Station Building chungchang pawh ngaihthlak niin a tha lo deuh lai chu siamthat zel niin thlak ngaite pawh thlak niin harsatna awm lo tura ngaih a ni. Counting Hall chungchang pawh DC Indoor Stadium hman leh a ni anga, hetah hian MP leh MLA By-Election vote chhiarna pawh a rualin neih tum a ni. Security Arrangement chungchang pawh SP Lunglei in report pe in a tul anga hmalak niin inthlanna felfai leh thianghlim tak neih theih tura beisei a ni. Khawkar kawng inkalpawhna te pawh siamthat zel niin a theih chin chin motor-a kalpawh tir vek tum a ni. WT Set chungchang pawh Wireless Officer in-charge atangin report ngaihthlak a ni a, engmah harsatna  awm lo tura report a ni.

Lunglei District chhunga MP leh MLA By-Election lo awm tur chungchanga ruahmanna chu tun dinhmunah chuan tha takin a kal tluang zel a ni.