Mizorama khawpui fai Pahnihna Lunglei a nih lawmna leh Faina hapta 2019 kharna inkhawm chu vawiin khan Convention Centre Lungleiah neih a ni.

He huna khuallian Lunglei Additional DC Pu David Liansanglura Pachuau chuan thu sawiin fana hapta kum 35 zet hman a nih tawh hnuah nasa taka Lunglei khawpui pawhin faina kawngah hma a sawn chu lawmawm a tih thu a sawi a, mimal leh pawl anga theihtawp chhuahtute avanga Lunglei chu fai a nih thu leh Mizorama fai lawmman pahnihna la thei dinhmuna an awm chu tan lakna hmanga Pakhatna ni thei tura theihtawp chhuah turin kal khawmte a fuih a, thang lo thar leh zel turte tan khawvel nuam zawk leh hmantlak zawk a awm theih nan Plastic hman tlem a pawimawh thu a sawi bawk a ni.

Lunglei Town Village Council Welfare Chairman Pu F. Lalzawmliana pawhin faina kawnga hmalakna zawnah veng leh veng inel tawh lova a khawpui huap a tanruala District dang el tura rilru kan siam a pawimawh tawh thu sawiin veng hrang hrang VC te pawhin veng bil rilru pu lova khawpui pumhuapa hmasawnna kawngngaihtuah a hun tawh thu a sawi bawk a ni.

Lunglei DUDO Pu Andrew Lalhruaia pawhin Lunglei in Khawpui fai pahnihna lawmman a dawn theih nana mimal pawl leh Sawrkar Dept. hrang hrangte faina kawnga hma an lakdan report pein fai zel tura tan lak a tul thu a sawi bawk a ni.

 Vawiina Faina hapta kharna hun Lungleia hmanah hian Faina Hapta puala fai inelna kawng hrang hranga neiha, a ti thate hnenah MHIP Sub Hqrs. Lunglei President Pi Lalliannguri kaihhruainain lawmman sem nghal a ni.