Vawiin chawhnu khan Cultural Heritage Centre, Lungleiah Information & Public Relations Department leh Films Division, Gov’t of India tangkawpa buatsaih film siam zirna workshop January  ni 30 – February ni 7 chhunga neih chu kharna hun hman a ni a. Pu Vanlalmuana, MIS, DIPRO Lunglei chuan inkhawm hi kaihruaiin, Pu K. Lalrohlua Deputy Commissioner, Lunglei chu Khuallian a ni. 

Pu K. Lalrohlua chuan thu sawiin Films Division leh I&PR Department-in Lungleia film siam zirna workshop an buatsaih chu lawmawm a tih thu a sawi a, Mizoramah film tam tak siam tawh niin, engemaw zat chu Lunglei kutchhuak a ni, a ti. Tunlai khawvel ah eizawnna kawng engpawh kan thlang a nih chuan thiam bikna kan neih a tul hle a ti a. Mizo thalaite tuina leh talent haichhuahna kawngah Film Industry hi a pawimawh hle a, Mizorama Film Industry pawhin sawrkar hmalakna avangin hma a sawn hle a, eizawnna atan pawh a hmantlak hial tawh a ni, a ti bawk. 

Vawiina kharna inkhawmah hian Pu Napoleon RZ Thanga, Local Coordinator chuan workshop neih dan chungchang report a pe a, Ni 9 chhung in concept, shooting leh editing te zir a ni a, film tawi pahnih (2) - Inkawibah leh It Happens Only In Mizoram te siam an ni.

Pu Joshy Joseph, Deputy Director General, Film Division Govt. of India pawhin  thawhhona tha tak an nei thei chu lawmawm a tih thu a sawi a. Mizo thalaite ina talent tha tak an neih chu ti pung zel tura a duh thu a sawi a ni. Hetiang workshop hi kum 2014 khan Aizawlah a vawikhatna atan neih a ni tawh tiin, a vawihnihna atan Lungleia buatsaih theih a ni chu lawmawm a tih thu a sawi bawk a ni.

Pu Lianchama Chhangte, President, MJA Sub-Hqrs, Lunglei chuan lawmthu sawina in a khar a. He hunah hian workshop a tel zawng zawng te hnenah certificate hlan nghal a ni a, film tawi an siam te thlirhona neih a ni bawk.