awiin khan Lunglei DC Conference Hall-ah Fisheries Department buatsaihin ‘Disbursement of NLUP Assistance-cum-Technical Training for 3rd & 4th Phase Beneficiaries’ neih a ni a. LAD Minister Pu PC Lalthanliana chu Khuallian niin NLUP tanpuina hi a sem nghal a; Pu Lalthlamuana, Secretary, Fisheries Department chu Khualzahawm niin he hun hi a hmanpui bawk.

Fisheries tanpuina semna leh training hawnna inkhawm Lunglei District NLUP Coordinator Pu Zathangliana kaihhruaiah Khuallian Pu PC Lalthanliana chuan vawiina NLUP tanpuina dawngte chuan thil mamawh tak tak lovah intlak ral lo turin a chah a, sorkarin tanpuina a pek hi vawiina hman zawh atan ni lovin an naktuk mamawh phuhruk tur atan a ni zawk, a ti. Sorkarin sangha khawitute hnenah tanpuina a pe reng chung pawhin Lunglei leh Aizawl-ah takngial pawh Silchar lam sangha lei tur a la tam hle a, sanghaah kan la intodelh thei lo hi inngaihtuah kan ngai a ni, a ti bawk. Kuthnathawktute chu ram neitu tak tak an nih angin sorkar pawhin a ngai pawimawh hle a, Lunglei District chhunga tanpuina dawng zawng zawngte chu kum 2/1 ah chuan intodelh turin tumruhna leh tihtakzetna nen thawk turin a chah. Lunglei-ah sangha chi siamna hmun nei thei thuai turin chak taka hmalak mek a nih thu a sawi bawk.

Khualzahawm Fisheries Secretary Pu Lalthlamuana pawhin thu sawiin sorkar chuan sangha chi lamah intodelh tumin hma a lak mek laiin sangha khawitute pawhin phai atangin sangha chi lei lovin mahni tharchhuah ngei siam turin a chah a. Rampum huapin New Delhi-ah ‘World Fishery Day’ hman a ni thin a, chutah chuan sangha khawi lian leh thate lawmman pek a ni thin a; chu chu Mizo sangha khawite pawhin dawng thei turin tan i la ang u tiin beneficiaries-te a fuih a. Mizoram-ah ‘Sangha Kut’ hmang turin National Fishery Development Board-ah sum dil mek a ni a, hmuh ngei pawh a beiseiawm thu a sawi bawk. Pu Lalthlamuana chuan Ministry of Tribal Affairs atangin sum hmuh a nih tur thu sawiin Lunglei District pawhin engemawzat an chang ngei ang a, state leh central sorkar atanga heng tanpuina hrang hrang kan dawnte hi mi harsa zawkte dawmkan nan hmang ila, thahnemngai takin ram hmasawn nan tangrual takin i thawk ang u, a ti.

Vawiina sangha khawi tanpuina dawngtute hi mi 190 an ni a, sangha dil siam nan cheng 40,000/- an dawng theuh a ni. NLUP tanpuina semna inkhawm chu Pu SP Singh, Jt Director, Fisheries-in a khar a; chawhnu lamah 3rd & 4th Phase beneficiaries-te tan training neih zui nghal a ni.