1634/2022-2023
Lunglei the 17th, August 2022 : United Nations Food and Agriculture Organization (FAO) hnuaia Green-Ag:Green Landscape Implementation Unit (GLIU), hmalaknate leh hmachhawp hrang hrang ngaihtuah ho turin vawiin khan 4th Technical Support Group (TSG) Virtual Meeting chu Lunglei DC Conference Hall ah neih a ni. He Project hi Lunglei District leh Mamit District-ah te kalpui mek niin vawiin virtual meeting ah hian Lunglei leh Mamit District a hmalak zel dan tur ngaihtuah hona neih a ni. Green Ag meeting ah hian Agriculture officials-te, Line Department te bakah Green-Ag National Project Management Unit (NPMU) hotute New Delhi atangin an tel a ni.

Meeting kaihruaitu Lunglei Deputy Commissioner, Pu Kulothungan A chuan Green Landscape Implementation Unit (GLIU) chu hmasawnna huap zau leh daih rei tak kan neih theihna tura duan anih thu sawiin he project kaltlang hian Line Departments hmalaknate chu ramngaw leh nungchate humhalh chunga kalpui anih tur thu a sawi.

Member Secretary Pu C. Malsawmkima, District Agriculture Officer, Lunglei chuan report pe in Green-Ag in a tum ber chu India rama Agriculture kalphung her rem a, loneitute tana hlawk zawk leh tha zawka kal pui a ni. Green Ag hnuaia hmalakna turah mizo buhban, hmarchate, chhawhchhi, vaimim leh vawk vulh te thlanchhuah niin heng thlai chin leh ran vulh te hi zir chian a, kuthnathawktute mamawh hrang hrang ngaihtuah pui bakah State pawn thlenga mumal zawka hralh chhuah dan ruahmanna siam anih tur thu a sawi. Village Implementation Committee (VIC)–te pawh din fel an nih tawh thu a sawi bawk.

Vawiin meeting-ah hian Action Plan for 2nd Quarter of 2022-2023 chhunga hmalakna leh hmalak tur te sawi hona neih a ni. Hemi hun chhung hian survey, workshop leh training-te ngawrh taka kalpui chhoh tum a ni. Mamit leh Lunglei District chhunga hmalakna hmasa atana chhawpchhuah High Priority Areas khaw 17 te tarlan nghal niin, he project hnuaia hmalakna hian Mamit District chhung khaw 13 leh Lunglei District khaw 4 te a tuam ang.

Green-Ag Project hi a Funding Agency chu Global Environment Facility (GEF) niin a Implementing Agency chu United Nations Food and Agriculture Organization (FAO) a ni a. Sawrkar laipuiah Ministry of Agriculture & Farmers’ Welfare leh Ministry of Environment, Forests & Climate Change te hnuaiah niin Mizoram Sawrkar hnuaia State Nodal Agency chu Department of Agriculture (Crop Husbandry) a ni.

He project hi kum 6 (01 April 2019 to 31 March, 2026) chhung atana ruahman niin Project kalpui tur hian State thlanchhuah panga te - Madhya Pradesh, Mizoram, Odisha, Rajasthan leh Uttarakhand Budget intawm chu USD 33,558,716 a chhut a ni. GLIU project kalpui a nih chhung hian a huam chhunga khaw hrang hrang a loneitute hmasawnna tur kawng chi hrang hrang bakah ramngaw leh nungcha humhalh te, project a zawh hnu pawh a eizawnna ngelnghet neihna tur lam hawi a hmalak a ni dawn a ni.