Vawiin chawhma dar 10:30 khan Lunglei Convention Centre-ah MHIP Lunglei Sub-Hqrs, District Legal Services Authority leh District Child Protection Unit tangkawp buatsaihin MHIP Kumpuan 2017-2019 “Hmeichhiate leh Naupangte hmasawnna leh himna atan nasa taka tan lak” hawnna programme hman a ni a. Social Welfare Minister Pu PC Lalthanliana chu khuallian a ni.

Pu PC Lalthanliana chuan hmeichhiate dinhmun chawikan leh an dikna humhalh chu sawrkar thil tum pawimawh ber te zing a mi a ni tiin  Mizo hmeichhiaten dinhmun tha zawk an neih theih nan khawtlang inrelbawlna kawnga a bulthut Local Council leh Village Council-ah te hmeichhe tana seat hauh sak (Women’s Reservation) neih a nih thu a sawi a. Hmeichhia leh naupangte humhalh kawngah sawrkarin nasa takin hma a la chho mek a, inneih, inthen leh rokhawm chungchanga dan mumal tak The Mizo Marriage, Divorce and Inheritance of Property Act, 2014 siam a nih bakah hmeichhia harsatna tawk ten phone hmanga an biak pawh nghal vat theih tur Universal Women Helpline Phone Number 181 siam a nih thu te, hmeichhia harsatna tawk tluk luh mai na neilo te tan One Stop Centre din a nih thu te leh Swadhar Shelter Home leh ruihhlo ngai te enkawlna hmun Protective Home siam a nih thu te Social Welfare Minister chuan a tarlang a. Naupangte dikna chanvo humhalh a nih theih nan sawrkarin district tinah Child Protection Unit a din bakah Commission for Protection of Child Rights din turin chak taka hmalak mek a nih thu kalkhawmte a hrilh bawk.

Vawiin programme, Lunglei Sub-Headquarters President Pi Zosangi kaihhruaiah hian Pi Julie Lalrinzami, CJM Lunglei leh Pi Lalrinkimi Hmar, DCPO Lunglei te chuan thupui thlanbik hmangin kalkhawmte an zirtir a. Pi Saipuii, President MHIP Gen Hqrs Aizawl leh Pi Lalengkimi, Asst Secretary, MHIP Gen Hqrs Aizawl te pawhin thu an sawi a ni.